Recent News

Copyright © 2024 Blaze themes. All Right Reserved.

ఎన్నికలను బహిష్కరించే ప్రసక్తే లేదు… చికాగోలో రాహుల్ గాంధీ స్పష్టీకరణ!

Share It:

చికాగో: ఎన్నికల ప్రక్రియను బహిష్కరించే ప్రత్యామ్నాయం తమ ముందు లేదని, ఎన్నికల్లో పోటీ చేస్తూనే అక్రమాలను ప్రజల ముందు బహిర్గతం చేస్తామని లోక్‌సభ ప్రతిపక్ష నేత రాహుల్ గాంధీ స్పష్టం చేశారు. ఈమేరకు చికాగో విశ్వవిద్యాలయంలో రాజనీతి శాస్త్ర ప్రొఫెసర్ రాబర్ట్ పేప్‌తో జరిగిన సంభాషణలో ఆయన భారత ప్రజాస్వామ్యం, ఎన్నికల వ్యవస్థ, ప్రతిపక్ష వ్యూహాలకు సంబంధించిన పలు కీలక అంశాలను పంచుకున్నారు.

ఎన్నికలలో అవకతవకలు జరుగుతున్నాయని ప్రతిపక్షాలు, కాంగ్రెస్ పార్టీ గట్టిగా విశ్వసిస్తున్నప్పుడు ఎన్నికలలో ఎందుకు పాల్గొంటున్నారని ప్రొఫెసర్ పేప్ ప్రశ్నించారు. దీనిపై స్పందించిన రాహుల్ గాంధీ, భారత ప్రజాస్వామ్యం తమకు పవిత్రమైనదని, ఎన్నికలను బహిష్కరించాలని నిర్ణయించుకుంటే ఆ క్షణమే ప్రజాస్వామ్యాన్ని అంతం చేసినట్లవుతుందని అన్నారు. తాము ప్రజాస్వామ్య వ్యవస్థను అంతం చేయాలనుకోవడం లేదని, ఎన్నికల నుంచి వైదొలగడం వల్ల కార్యకర్తల పరిస్థితి ఏమిటని ప్రశ్నించారు. బదులుగా ఎన్నికల్లో పోటీ చేస్తూనే, దేశంలో ఏం జరుగుతోందో పోరాడి ప్రజలకు బహిర్గతం చేయడమే తమ వ్యూహమని వివరించారు.

ఎన్నికల ప్రక్రియలో తీవ్రమైన సమస్యలు ఉన్నాయని, అవకతవకలకు సంబంధించి ప్రతిపక్షం వద్ద ఆధారాలు ఉన్నాయని రాహుల్ గాంధీ ఆరోపించారు. ప్రతిపక్షాల ఆందోళనలకు ఎన్నికల సంఘం తగిన విధంగా స్పందించడం లేదని విమర్శిస్తూ, ఎన్నికల సంఘం లోపలి నుంచే తమకు సమాచారం అందుతోందని, ఉన్నతాధికారులలోనే అసంతృప్తి వ్యక్తమవుతోందని పేర్కొన్నారు. వ్యవస్థ పూర్తిగా కుప్పకూలిపోయిందని ప్రజలు గ్రహించే వరకు దెబ్బలు తినడమే తమ వ్యూహమని, ఆ వ్యవస్థలు కుప్పకూలడం కాలం మాత్రమే తీసుకునే విషయమని వ్యాఖ్యానించారు. ఓటర్ల జాబితా, ఎన్నికల చట్టబద్ధతపై సందేహాలు వ్యక్తం చేస్తూ, 2024 ఎన్నికల్లో అనర్హుల అంశంపై ప్రశ్నలు లేవనెత్తారు.

2014 ఎన్నికల ఫలితాల అంతరాల నుంచే తమకు అనుమానాలు మొదలయ్యాయని రాహుల్ గాంధీ గుర్తుచేసుకున్నారు. తాను అక్రమాలకు సంబంధించిన ఆధారాలుగా భావించిన వాటిని పార్టీ సీనియర్ నాయకుల ముందు ఉంచినప్పటికీ, అటువంటి ఆరోపణలను బహిరంగంగా చేయవద్దని వారు సూచించారని చెప్పారు. అందుకే మరింత స్పష్టమైన రుజువులు దొరికే వరకు వేచి చూశానని తెలిపారు.

మొత్తంగా ప్రజలు ఎలాంటి భయం లేకుండా తమ అభిప్రాయాలను వ్యక్తపరిచే స్వేచ్ఛను తిరిగి పొందేలా పోరాడుతున్నామని ఆయన అన్నారు. ప్రజాస్వామ్యేతర భారతదేశాన్ని అంగీకరించేది లేదని, నిర్భయంగా గొంతు విప్పే స్వేచ్ఛే దేశానికి అసలైన బలంగా నిలిచేలా ప్రతిపక్షం చూస్తుందని రాహుల్‌ గాంధీ స్పష్టం చేశారు.

Tags :

Grid News

Latest Post

వర్తమానం ఒక ప్రముఖ తెలుగు వెబ్ పత్రిక. డిజిటల్ రంగంలో నిజాయితీ, పారదర్శకత, విశ్వసనీయతతో కూడిన వార్తలను ప్రజలకు అందించడమే లక్ష్యంగా ఏర్పాటైంది.

Latest News

Most Popular

Copyright © 2024 Vartamanam. All Right Reserved.