వాషింగ్టన్: గాజా స్ట్రిప్‌ను పూర్తిగా ఆక్రమించాలనే ఇజ్రాయెల్ ప్రణాళికలపై వ్యాఖ్యానించడానికి అమెరికా అధ్యక్షుడు డొనాల్డ్ ట్రంప్ నిరాకరించారు, ఈ నిర్ణయం “పూర్తిగా ఇజ్రాయెల్‌పై ఆధారపడి ఉంటుంది” అని చెబుతూనే, గాజా నివాసితులకు ఆహార సహాయం అందించడంపై తన ప్రభుత్వం దృష్టి సారించిందని చెప్పారు.
ఈ మేరకు వైట్ హౌస్‌లో విలేకరులతో మాట్లాడుతూ… ఇజ్రాయెల్ గాజా పునరావాస ప్రణాళికకు తాను మద్దతు ఇస్తున్నానా లేదా అనే ప్రశ్నలకు ట్రంప్ సమాధానమిస్తూ, “ఈ విషయంలో వారి ప్రతిపాదన ఏమిటో నాకు తెలియదు. ఇది పూర్తిగా ఇజ్రాయెల్‌పై ఆధారపడి ఉంటుంది. ప్రస్తుతం అక్కడి ప్రజలకు ఆహారం అందించడానికి మేము కృషి చేస్తున్నామని” ట్రంప్ అన్నారు.
గాజాకు మానవతా సహాయంపై వాషింగ్టన్ దృష్టి
గాజా వాసులు “ఆహారం విషయంలో స్పష్టంగా మంచి స్థితిలో లేరు” అని ట్రంప్ నొక్కిచెప్పారు మరియు మానవతా సంక్షోభాన్ని పరిష్కరించడంపై తన పరిపాలన దృష్టి సారించిందని చెప్పారు.
గాజాకు ఆహార సహాయం పంపిణీ చేయడంలో అమెరికా ఇజ్రాయెల్‌తో కలిసి పనిచేస్తోందని, కొన్ని అరబ్ దేశాలు ఆహార సహాయ ప్రయత్నాలకు ఆర్థిక సహకారాన్ని అందిస్తాయని అధ్యక్షుడు ధృవీకరించారు.
“గాజా ప్రజలకు సరిగా ఆహారం అందడం లేదు. నేను దానిపైనే దృష్టి పెట్టాను. నాకు తెలిసినంతవరకు ఆహార పంపిణీ, డబ్బు పరంగా ఇజ్రాయెల్ మాకు సహాయం చేస్తుంది. అరబ్ దేశాలు… డబ్బు, ఆహార పంపిణీ రెండింటిలోనూ సహాయం చేస్తాయి. దానిపైనే నేను దృష్టి సారించాను. మిగిలిన వాటి విషయానికొస్తే, నేను నిజంగా ఏమీ చెప్పలేను. అది ఇజ్రాయెల్ ఇష్టం”అని ట్రంప్ అన్నారు.
ఇతర విదేశాంగ విధాన అంశాలపై ట్రంప్ చర్చ
అదే విలేకరుల సమావేశంలో, చైనాతో సహా రష్యా నుండి ఇంధనాన్ని కొనుగోలు చేసే దేశాలపై సుంకాల గురించి ట్రంప్ ప్రశ్నలను ఎదుర్కొన్నారు.
100% సుంకాలను అమలు చేయడంపై… ట్రంప్ తన మిడిల్ ఈస్ట్ ప్రత్యేక ప్రతినిధి స్టీవ్ విట్కాఫ్ మాస్కోలో రష్యన్ అధికారులతో సమావేశమవుతారని చెప్పారు.
“నేను ఎప్పుడూ శాతం సంఖ్యను ఇవ్వలేదు. కానీ ఈ విషయంపై మేము చాలా చేస్తాము. మీకు తెలుసా, నేడు మేము రష్యాతో సమావేశం అవుతాము. ఏమి జరుగుతుందో చూద్దాం. అప్పుడు మేము మా నిర్ణయం తీసుకుంటాము, ”అని ట్రంప్ అన్నారు.
ఉక్రెయిన్ యుద్ధం గురించి ట్రంప్ మాట్లాడుతూ… “చూడండి, మీరు దీన్ని బాగా అర్థం చేసుకోవాలి: ఇది జో బిడెన్ మొదలు పెట్టిన యుద్ధం. ఇది నా యుద్ధం కాదు. ఈ ఊబి నుండి అమెరికాను బయటకు తీసుకురావడానికి నేను ఇక్కడ ఉన్నాను. ఇది పూర్తి గందరగోళం, నేను ఈ గందరగోళం నుండి మనల్ని రక్షించడానికి వచ్చాను.”
గత ఐదు నెలల్లో ఐదు యుద్ధాలను ముగించినట్లు ట్రంప్ పేర్కొన్నారు, “నిజం చెప్పాలంటే, ఇది (రష్యా-ఉక్రెయిన్ యుద్ధం) ఆరవదిగా ఉండాలని నేను కోరుకుంటున్నానని అన్నారు.”
ట్రంప్ వారసుడి గురించి అడగ్గా… ట్రంప్ తన తర్వాత రిపబ్లికన్ నామినీగా వైస్ ప్రెసిడెంట్ జెడి వాన్స్ ఉంటారని సూచించారు. న్యాయంగా చెప్పాలంటే, ఆయన ఉపాధ్యక్షుడు. విదేశాంగ కార్యదర్శి మార్కో రూబియో ఏదో ఒకవిధంగా జెడితో కలిసి రావచ్చని నేను భావిస్తున్నాను. అయితే, దీని గురించి ఇప్పుడే మాట్లాడటం చాలా తొందరపాటు అవుతుంది. ఇక్కడ వేదికపైకి వచ్చిన వారిలో గొప్ప వ్యక్తులు కూడా ఉన్నారు. కానీ ఖచ్చితంగా, (జెడి వాన్స్) గొప్ప పని చేస్తున్నాడు. ఈ సందర్భంలో బహుశా మరింత ప్రయోజనకరంగా ఉంటారు.”
ఇజ్రాయెల్ అంతర్గత సైనిక ఉద్రిక్తతలు
ఇంతలో, గాజా ఆక్రమణ ప్రణాళికలపై ప్రధాన మంత్రి బెంజమిన్ నెతన్యాహు మరియు చీఫ్ ఆఫ్ స్టాఫ్ ఇయాల్ జమీర్ మధ్య గణనీయమైన ఉద్రిక్తతలు ఉన్నాయని ఇజ్రాయెల్ మీడియా నివేదికలు వెల్లడిస్తున్నాయి. ఇజ్రాయెల్ టెలివిజన్ KAN ప్రకారం… గాజా స్ట్రిప్‌ను పూర్తిగా ఆక్రమించాలనే ప్రణాళికలు “దేశాన్ని ఒక ఉచ్చులోకి లాగుతున్నాయి” అని జమీర్ నెతన్యాహుతో అన్నారు.
ఇరువురు నేతల సమావేశం సందర్భంగా… ప్రభుత్వంలో “తిరుగుబాటు ప్రయత్నం”కి తాను నాయకత్వం వహించినట్టుగా నెతన్యాహు కుమారుడు యైర్ నెతన్యాహు ఎందుకు ఆరోపణలు చేస్తున్నారని జమీర్ ప్రశ్నించినట్లు తెలిసింది.
ఇజ్రాయెల్ ప్రధాన మంత్రి కార్యాలయం జమీర్‌కు ఒక సందేశాన్ని పంపినట్లు తెలిసింది, “గాజా మొత్తాన్ని ఆక్రమించాలనే ప్రణాళిక మీకు సరిపోకపోతే, మీరు రాజీనామా చేయాలి.”
జమీర్ విమర్శకు నెతన్యాహు స్పందిస్తూ, “పత్రికల ముందు రాజీనామా చేస్తానని బెదిరించవద్దు. మేము మీ ప్రణాళికను అంగీకరించనప్పుడు… మీ రాజీనామా బెదిరింపులకు నేను భయపడనని అన్నారు.
ఈ విషయం తెలిసిన ఇజ్రాయెల్ వర్గాలు ఆ దేశ టెలివిజన్ KAN కి నెతన్యాహు గాజా స్ట్రిప్‌ను పూర్తిగా ఆక్రమించుకోవాలని భావిస్తున్నారని, చీఫ్ ఆఫ్ స్టాఫ్ జమీర్ అటువంటి సమగ్ర ఆక్రమణ ప్రణాళికను వ్యతిరేకిస్తున్నారని చెప్పారు.
