హైదరాబాద్: జీఎస్‌టీ శ్లాబులలో మార్పులు మధ్యతరగతికి ప్రయోజనం చేకూర్చనున్నాయి. ప్రభుత్వ నిర్ణయంతో రూ.6 లక్షల నుంచి రూ.10 లక్షల మధ్య ధర ఉండే చిన్న కార్ల ధరలు భారీగా తగ్గుతాయి. జీఎస్టీ 28 నుంచి 18 శాతానికి తగ్గడంతో ధరలో 10 శాతం ఆదా అవుతుంది. బైక్‌లు మరింత సరసమైనవిగా మారతాయి.

గతంలో, ప్రభుత్వం ఆదాయపు పన్ను మినహాయింపు పరిమితిని రూ. 12 లక్షలకు పెంచింది. వడ్డీ రేట్లను తగ్గించింది, సామాన్యులకు చాలా ఉపశమనం కలిగించింది. అయితే, పెద్ద బైక్‌లు, లగ్జరీ కార్లపై పన్నులు పెంచారు.

కొత్త GST శ్లాబులతో ఎవరికి ప్రయోజనం?
1500cc లోపు డీజిల్ కార్లు, 1200cc లోపు పెట్రోల్/CNG/LPG కార్లపై ఇప్పుడు 18 శాతం GSTని మాత్రమే వసూలు చేస్తారు. ఇది మునుపటి పన్ను రేట్ల నుండి 10 శాతం తగ్గింపు.

భారతీయ రోడ్లపై ఎక్కువగా కనిపించే టాటా ఆల్ట్రోజ్, మారుతి సుజుకి స్విఫ్ట్, హ్యుందాయ్ i10, i20, రెనాల్ట్ క్విడ్ చౌకగా మారతాయి. దీని అర్థం కొనుగోలుదారులు రూ. 60,000 నుండి రూ. లక్ష వరకు ఎక్కడైనా ఆదా చేయవచ్చు.

బజాజ్ పల్సర్, హీరో స్ప్లెండర్ వంటి ద్విచక్ర వాహనాలు ఇప్పుడు జీఎస్టీ 28 శాతం నుంచి 18 శాతానికి తగ్గడంతో చౌకగా లభిస్తాయి.

రేట్లు పెరిగే వాహనాలు?
అయితే, రాయల్ ఎన్‌ఫీల్డ్, కెటిఎమ్ వంటి 350సీసీ కంటే ఎక్కువ సామర్థ్యం ఉన్న హై-ఎండ్ బైక్‌లు 40 శాతం జీఎస్టీతో పాటు 3 శాతం సెస్సుతో ఖరీదైనవి కావడంతో సామాన్యుల జేబుకు చిల్లుపడతాయి.

టాటా హారియర్, మహీంద్రా ఎక్స్‌యూవీ700, మారుతి గ్రాండ్ విటారా, హ్యుందాయ్ క్రెటా వంటి ఎస్‌యూవీలు 40 శాతం జీఎస్టీని ఎదుర్కోవలసి ఉంటుంది.

అయితే, మునుపటి సెస్సును రద్దు చేసినందున, కొనుగోలుదారులు పాత రేట్లతో పోలిస్తే ఐదు శాతం నుండి పది శాతం వరకు ఆదా చేసుకోవచ్చు. ఎలక్ట్రిక్ వాహనాల విషయానికొస్తే, జీఎస్టీ 5 శాతంతో కొనసాగుతుంది.