న్యూయార్క్: న్యూయార్క్లో జరుగుతున్న ఐక్యరాజ్యసమితి సాధారణ అసెంబ్లీ (UNGA) 81వ సమావేశాల్లో స్పెయిన్ ప్రధాని పెడ్రో సాంచెజ్ ఇజ్రాయెల్ ప్రధాని నెతన్యాహు నేతృత్వంలో గాజాలో జరుగుతున్న దాడులను తీవ్రంగా ఖండించారు. గాజాలో జరుగుతున్నది “మారణహోమం (Genocide)” అని ఆయన స్పష్టం చేశారు.
అంతేకాదు ఐరాస భద్రతా మండలి తీర్మానాలను కొన్ని దేశాలు అడ్డుకుంటున్న తీరుపై స్పందిస్తూ, శాశ్వత సభ్యదేశాలకు ఉన్న “వీటో (Veto) అధికారాన్ని” పూర్తిగా రద్దు చేయాలని పిలుపునిచ్చారు. ఈమేరకు ఐక్యరాజ్యసమితి భద్రతా మండలిలో సమూల మార్పులు చేయాలని డిమాండ్ చేశారు.
ప్రస్తుత వాస్తవాలను ప్రతిబింబించేలా అంతర్జాతీయ పాలనా వ్యవస్థ మారాలని సాంచెజ్ నొక్కి చెప్పారు: “ప్రపంచంలోని అన్ని ప్రాంతాలకు సరైన ప్రాతినిధ్యం లభించాలని ఆయన ఆకాంక్షించారు. ఐక్యరాజ్యసమితి చార్టర్ సూత్రాల ప్రకారం, “ఏ దేశమూ, ఎంత శక్తివంతమైనదైనా సరే, తన సొంత కేసులో తానే న్యాయమూర్తిగా ఉండకూడదు” అని సాంచెజ్ పేర్కొన్నారు.
ప్రపంచాన్ని తిరిగి “చీకటి గతం”లోకి నెట్టాలనుకునే రాజకీయ శక్తులు శాంతి, స్థిరత్వం, సమాన అవకాశాలు వంటి ప్రాథమిక స్తంభాలపై క్రమపద్ధతిలో దాడి చేస్తున్నాయని ఆయన హెచ్చరించారు.
ఈ సందర్భంగా స్పెయిన్ విదేశాంగ విధాన చర్యలను ప్రముఖంగా ప్రస్తావిస్తూ, రష్యాపై ఆంక్షలను, ఇజ్రాయెల్ ప్రభుత్వంపై మాడ్రిడ్ విధించిన ఆయుధాల నిషేధాన్ని శాంచెజ్ ఉదహరించారు. “గాజాలో నెతన్యాహు ఇప్పటికీ కొనసాగిస్తున్న జాతిహత్యను” “నిస్సందేహంగా” ఖండిస్తున్నట్లు ఆయన పునరుద్ఘాటించారు.
ఐక్యరాజ్యసంస్థ వంటి సంస్థలను బలహీనపరిచే లక్ష్యంతో జరుగుతున్న “ప్రణాళికాబద్ధమైన, సమన్వయంతో కూడిన విధ్వంసక ప్రయత్నాన్ని” శాంచెజ్ తీవ్రంగా ఖండించారు: “వారు మొదట నిబంధనలను ప్రశ్నిస్తారు, ఆపై వాటిని ఉల్లంఘిస్తారు. తమను జవాబుదారీగా నిలబెట్టే ధైర్యం ఎవరికీ ఉండదని వారికి బాగా తెలుసు. ఇలాంటి బహుళపక్ష సంస్థలకు వారు ఇచ్చే విరాళాలను తగ్గించుకుంటారు. ఈ సంస్థలు పనిచేసే సామర్థ్యాన్ని అడ్డుకుంటారు, ఆ తర్వాత వాటిని మనకు అవసరం లేని పనికిరాని సంస్థలుగా కొట్టిపారేస్తారు.” ఈ సవాళ్లు ఉన్నప్పటికీ, ఐక్యరాజ్యసమితిపై విశ్వాసాన్ని తిరిగి పెంపొందించుకోవాలని స్పెయిన్ ప్రధాని సభ్య దేశాలను కోరారు.
వారసత్వం విషయానికి వస్తే, తదుపరి సెక్రటరీ-జనరల్ ఒక లాటిన్ అమెరికన్ మహిళ అయి ఉండాలని శాంచెజ్ నొక్కి చెప్పారు. ఇప్పటివరకు ఈ పదవిలో ఉన్న తొమ్మిది మంది పురుషులేనని గుర్తుచేస్తూ, దీనిని “మనం తీర్చవలసిన చారిత్రక రుణం”గా ఆయన అభివర్ణించారు. జూలై నెలాఖరులో సుమారు 72,000 మంది అక్రమంగా సరిహద్దు దాటిన ఉత్తర ఆఫ్రికాలోని సెయుటా ప్రాంతంలో వలసల అంశంపై మాట్లాడుతూ, స్పెయిన్ “వలసదారులను శత్రువులుగా మార్చకుండా” మానవ హక్కులను గౌరవిస్తుందని సాంచెజ్ హామీ ఇచ్చారు.
