హైదరాబాద్: కరీంనగర్లోని శాతవాహన యూనివర్సిటీలో దళిత మహిళా ప్రొఫెసర్ సూరేపల్లి సుజాతపై జరుగుతున్న వేధింపులను తక్షణమే ఆపాలని, ఆమెను ‘అర్బన్ నక్సల్స్’గా ముద్ర వేయడం మానుకోవాలని, ఆమె భద్రత, గౌరవం, శ్రేయస్సుకు భంగం కలిగించే ఎలాంటి చర్యలకైనా దూరంగా ఉండాలని దేశ, విదేశాలకు చెందిన సామాజిక కార్యకర్తలు తెలంగాణ ముఖ్యమంత్రి రేవంత్ రెడ్డిని కోరారు.
విప్లవ రచయిత పి. వరవరరావుతో పాటు విద్యావేత్తలు, సాంఘిక కార్యకర్తలు, న్యాయవాదులు, రాజకీయ నాయకులు, అన్ని వర్గాల ప్రజలు సహా 209 మంది కార్యకర్తలు సంతకం చేసిన ఒక లేఖలో, డాక్టర్ సుజాత నమోదు చేసిన FIR ఆధారంగా, పెంచాల శ్రీనివాస్,అతనికి సహకరిస్తున్న ఇతరులపై షెడ్యూల్డ్ కులాలు, షెడ్యూల్డ్ తెగల (అత్యాచారాల నివారణ) చట్టం, 1989 కింద చట్టపరమైన చర్యలు తీసుకోవాలని వారు డిమాండ్ చేశారు.
విద్యాశాఖను కూడా నిర్వహిస్తున్న ముఖ్యమంత్రి, నిబంధనల ప్రకారం డాక్టర్ సుజాతకు రావలసిన అన్ని విద్యాసంబంధ పదవులు, పదోన్నతులను తక్షణమే ఆమెకు అందేలా చూడాలని, అలాగే ఆమెను ‘అర్బన్ నక్సల్’గా ముద్ర వేయడంలో పాత్ర పోషించిన శాతవాహన విశ్వవిద్యాలయం వైస్-ఛాన్సలర్పై విచారణ జరిపి తగిన చర్యలు ప్రారంభించాలని వారు కోరారు.
“గత కొన్ని వారాలుగా, ఆమెను మరోసారి అత్యంత అభ్యంతరకరమైన రీతిలో లక్ష్యంగా చేసుకుని ‘అర్బన్ నక్సల్’గా అపఖ్యాతి పాలు చేశారు. ప్రింట్, ఎలక్ట్రానిక్, సోషల్ మీడియా ద్వారా తప్పుడు సందేశాల వెల్లువను విస్తృతం చేశారు,” అని ఆ లేఖలో పేర్కొన్నారు. ఈ విషయమై ప్రభుత్వ అధికారులకు, ఎంపీలకు లేఖలు పంపించామని వారు తెలిపారు.
పెంచాల శ్రీనివాస్ అనే వ్యక్తి ఈ దాడికి పాల్పడ్డాడని కార్యకర్తలు ఆరోపించారు. ఈ వ్యక్తి గతంలో విశ్వవిద్యాలయంలో కాంట్రాక్టు పద్ధతిలో అసిస్టెంట్ ప్రొఫెసర్గా పనిచేశారు, కానీ అవకతవకలు,మహిళా విద్యార్థులను వేధించారనే ఆరోపణల కారణంగా 2021లో విశ్వవిద్యాలయం నుండి తొలగించారు.
అతను ఒక బ్యాంకు మోసం కేసులో జైలు శిక్ష అనుభవించాడని కూడా పేర్కొంటూ, పలువురు విద్యార్థుల నుండి అభ్యంతరాలు ఉన్నప్పటికీ, వైస్ ఛాన్సలర్ ద్వారా ‘రాజకీయ పలుకుబడి’ ఉపయోగించి ఏప్రిల్ 2026లో పార్ట్టైమ్ లెక్చరర్గా విశ్వవిద్యాలయంలో తిరిగి చేరాడని కార్యకర్తలు తెలిపారు.
“రూల్స్ ప్రకారం విద్యాపరంగా ఉన్నత పదోన్నతి పొందవలసిన డాక్టర్ సుజాతను ప్రిన్సిపాల్,డీన్ పదవుల నుండి ఏకపక్షంగా, కక్షపూరితంగా తొలగించినట్లు మా దృష్టికి వచ్చింది. అంతేకాకుండా, ఆమె క్యాంపస్లో తీవ్రమైన నిఘాను ఎదుర్కొంటున్నారు,” అని కార్యకర్తలు ఆరోపించారు.
సుజాతపై వేధింపులను అరికట్టాలని సంక్షేమ శాఖ మంత్రి అడ్లూరి లక్ష్మణ్ కుమార్ వైస్ ఛాన్సలర్ను కోరినప్పటికీ, ఈ సమస్యను తగినంత వేగంగా పరిష్కరించడానికి ఆయన నుండి ఎటువంటి నిర్దిష్ట చర్యలు లేవని వారు ఆందోళన వ్యక్తం చేశారు. “మరోవైపు, కొన్ని ఉల్లంఘనలకు వీసీ కూడా సహకరిస్తున్నట్లు కనిపిస్తోంది,” అని కార్యకర్తలు అనుమానించారు.
అక్టోబర్ 2024 నుండి, రాష్ట్ర ప్రభుత్వం ఏర్పాటు చేసిన విద్యా కమిషన్ సలహా సంఘంలో సురేపల్లి సుజాత కూడా సభ్యురాలిగా ఉన్నారని ఎత్తి చూపుతూ, ఆమె ఎదుర్కొంటున్న వేధింపులకుఅంతులేకుండా పోయిందని, ఈ వేధింపులను పరిష్కరించడానికి, రాష్ట్ర ప్రభుత్వం నుండి ఎటువంటి స్పష్టమైన చర్యలు లేవని కార్యకర్తలు ఆశ్చర్యం వ్యక్తం చేశారు. ఇదే విధంగా మరో దళిత విద్యార్థి, కరికే మహేష్ (ఎకనామిక్స్ విభాగం) కూడా లక్ష్యంగా చేసుకున్నారని వారు పేర్కొన్నారు.
“విద్యా సంస్థలు… విద్యార్థులు, ఉపాధ్యాయులు స్వేచ్ఛగా, నిర్భయంగా నేర్చుకోవడానికి, బోధించడానికి వీలు కల్పించే ప్రదేశాలుగా ఉండాలి. దళిత, బహుజన, ఆదివాసీ,మైనారిటీ వర్గాలకు చెందిన అనేకమంది మొదటి తరం అభ్యాసకులకు, విద్యావేత్తలకు ఇది చాలా ముఖ్యమని” ఆ లేఖలో పేర్కొన్నారు.
తనపై జరుగుతున్న వేధింపుల ఆరోపణలపై ఏప్రిల్ 2న తెలంగాణ ఎస్సీ & ఎస్టీ కమిషన్ ఛైర్పర్సన్కు సుజాత సమర్పించిన వివరణాత్మక ఫిర్యాదును కూడా కార్యకర్తలు జతచేశారు. తెలంగాణలోని విద్యాసంస్థలు, విశ్వవిద్యాలయాల్లో మితవాద నిర్వాహకులు, అధ్యాపకుల ఉనికి పెరుగుతోందని కార్యకర్తలు తీవ్ర ఆందోళన వ్యక్తం చేశారు.
“రాష్ట్రంలో రాజ్యాంగ, లౌకిక విలువలను పరిరక్షిస్తామని మీరు ఎన్నికలకు ముందు ఇచ్చిన హామీని మేము మీకు గట్టిగా గుర్తు చేస్తున్నాము. క్యాంపస్లు, విద్యాసంస్థల్లో అశాంతి సృష్టించేందుకు మితవాద, మత ఛాందసవాద శక్తులు చేసే దుశ్చర్యలను మీ ప్రభుత్వం అప్రమత్తంగా ఉండి, మొగ్గలోనే తుంచేయాల్సిన బాధ్యత ఉంది,” అని కార్యకర్తలు ముఖ్యమంత్రికి గుర్తు చేశారు.
