మాల్దా: పశ్చిమ బెంగాల్ సరిహద్దు జిల్లాల్లో తీవ్ర భయాందోళనలు నెలకొన్నాయి. రాష్ట్ర ప్రభుత్వం కొత్తగా చేపట్టిన దూకుడు వైఖరి “గుర్తించండి, తొలగించండి, బహిష్కరించండి” విధానం, పటిష్టమైన నిర్బంధ కేంద్రాల ఆకస్మిక ఏర్పాటు, వివాదాస్పదమైన ఓటర్ల జాబితా ప్రత్యేక విస్తృత సవరణ (SIR) వంటివి మైనారిటీ వర్గాలను తమ సొంత గడ్డపైనే విదేశీయులుగా ముద్రపడతామనే భయానికి గురిచేశాయి. దేశ బహిష్కరణకు ముందు పత్రాలు లేని వలసదారులకు ఆశ్రయం కల్పించేందుకు రాష్ట్రంలో నిర్బంధ కేంద్రాలను కూడా ఏర్పాటు చేశారు.

ఈమేరకు మాల్డాలో ఆందోళనకు గురైన ఓ కుటుంబ పెద్ద మాట్లాడుతూ…”నా కుటుంబంలోని ప్రతి ఒక్కరి ఓటర్ ఐడీలు, ఆధార్ కార్డులు, రేషన్ కార్డులను నేను దగ్గరలోనే ఉంచుకుంటాను. నేను మార్కెట్‌కు వెళ్ళినప్పుడు కూడా నా ఓటర్ ఐడీ, ఆధార్ కార్డును నాతో పాటు తీసుకువెళ్తాను. గత రెండు నెలలుగా ఇది నాకు అలవాటుగా మారింది. నాలో ఒక భయం పనిచేస్తోందన్న విషయాన్ని నేను కాదనలేను, దానికి కారణం నా మత గుర్తింపు,” అని మాల్దాలోని మోతాబారికి చెందిన తైమూర్ ఖాన్ అన్నారు.

కాగా, 2026 అసెంబ్లీ ఎన్నికలకు ముందు నిర్వహించిన SIR ప్రక్రియ, ప్రస్తుత భయానికి కేంద్ర బిందువుగా మారింది. ఈ సవరణ వల్ల పశ్చిమ బెంగాల్‌లో సుమారు 91 లక్షల పేర్లు తొలగించారు. ఇది రాష్ట్ర ఓటర్లలో దాదాపు 10.9 శాతానికి సమానం. దీనివల్ల ముస్లింలు తీవ్రంగా ప్రభావితమయ్యారు.

“సర్ (SIR) వల్ల నేను ఈసారి ఓటు వేయలేకపోయాను. మా కుటుంబంలోని ముగ్గురి పేర్లు జాబితాలో లేవు. ఇప్పుడు, మా కేసు వాదించడానికి న్యాయవాది ఎప్పుడు వస్తారో నాకు తెలియడం లేదు,” అని లాల్‌గోలాకు చెందిన గుల్షన్ షేక్ అన్నారు. “పోలీసులు చాలా మందిని బంగ్లాదేశీయులుగా ముద్రవేసి అరెస్టు చేస్తున్నారు. మా గత ఏడు తరాలు ఈ నేలపైనే పెరిగాయి, కానీ ఇంతకు ముందు ఎప్పుడూ ఇంతటి ప్రమాదం లేదు.”

అత్యంత ఎక్కువగా ప్రభావితమైన జిల్లాలలో ముర్షిదాబాద్, మాల్దా ఉన్నాయి.

ముస్లింలు అధిక సంఖ్యలో ఉన్న, విస్తారమైన నదీతీర, కోతకు గురయ్యే ప్రాంతాలు గల జిల్లా అయిన ముర్షిదాబాద్‌లో, 4.55 లక్షలకు పైగా ఓటర్లు ఓటర్ల జాబితాలో ఉండటానికి అర్హులు కాదని తేలి, పరిశీలనలో ఉంచారు. అదే సమయంలో, మాల్దాలో న్యాయ సమీక్ష తర్వాత 2.93 లక్షల మంది తమ ఓటు హక్కును కోల్పోయారు.

ఇప్పటికే ఓటర్ల జాబితా నుండి తొలగింపుకు గురయి, ట్రిబ్యునల్ ఆమోదం కోసం ఎదురుచూస్తున్న వారిలో, తమను విదేశీయులుగా చూస్తారనే భయాలను మరింత పెంచాయి. కాలానుగుణ వరదలు,కోత కారణంగా కుటుంబాలు తరచుగా భూమి, ఇళ్లు, పత్రాలను కోల్పోయే చార్,నదీతీర ప్రాంతాలలో ఈ ఆందోళన తీవ్రంగా ఉంది.

మాల్దాలోని కలియాచక్‌లో, ఉపాధ్యాయుడు అలీ హుస్సేన్ ఆందోళన వ్యక్తం చేశారు. “ఎవరికైనా ఏ కారణం చేతనైనా పోలీసులతో వివాదం ఏర్పడితే, వారిని బంగ్లాదేశీయులుగా ముద్రవేసి, దేశం నుండి బహిష్కరించే అధికారం పూర్తిగా వారి చేతుల్లోనే ఉందని వారు భయపడుతున్నారు. చట్టం లేదా న్యాయస్థానాలు జోక్యం చేసుకోవడానికి అవకాశం లేదు. కాబట్టి, భయపడటం సహజం.”

పశ్చిమ బెంగాల్ ముఖ్యమంత్రి సువెందు అధికారి ఈ ప్రచారాన్ని సమర్థించారు. హకీంపూర్ సమీపంలో బంగ్లాదేశీయులు గుమిగూడుతున్నారన్న వార్తల నేపథ్యంలో, ఆయన, “త్వరగా పారిపోండి, లేకపోతే ప్రభుత్వం చేయాల్సింది చేస్తుంది” అని హెచ్చరించారు.

రాష్ట్రంలో ప్రస్తుతం జరుగుతున్న ఈ చర్య, కేంద్ర హోం మంత్రిత్వ శాఖ మే 2025లో జారీ చేసిన దేశ బహిష్కరణ మార్గదర్శకాల నుండి ఉద్భవించిన ఒక విస్తృత విధాన చట్రానికి ముడిపడి ఉంది. ఈ మార్గదర్శకాల ప్రకారం జిల్లా స్థాయి ప్రత్యేక టాస్క్ ఫోర్స్‌లు, బయోమెట్రిక్ ట్రాకింగ్, పత్రాల ధృవీకరణ, సక్రమంగా పొందలేదని తేలిన గుర్తింపు పత్రాల రద్దు, కేంద్ర ప్రభుత్వానికి నెలవారీ నివేదికలు సమర్పించడం, అనుమానిత విదేశీయులను సాధారణ జైళ్లలో ఉంచడానికి బదులుగా ప్రత్యేక నిర్బంధ కేంద్రాలను ఏర్పాటు చేయడం వంటివి అవసరం.

మాల్దా సూపరింటెండెంట్ ఆఫ్ పోలీస్ అనుపమ్ సింగ్ మాట్లాడుతూ, “చొరబాటుదారులను పట్టుకుని ఇక్కడ ఉంచుతున్నాము. వారి భోజన, వసతి ఏర్పాట్లు జరుగుతున్నాయి. దీని తర్వాత, రాష్ట్ర ఇంటెలిజెన్స్ బ్యూరో (IB) ఈ విషయాన్ని బీఎస్ఎఫ్‌తో చర్చించి తదుపరి చర్యలు తీసుకుంటుంది. మేము ఒక నోడల్ ఏజెన్సీగా మా పనిని మాత్రమే చేస్తున్నాము.”

గుర్తింపు ప్రక్రియను పోలీసులు వెల్లడించనప్పటికీ, భారతీయ జనతా పార్టీ (బీజేపీ), తృణమూల్ కాంగ్రెస్ (టీఎంసీ) కార్యకర్తల నుండి నిఘా అధికారులు క్షేత్రస్థాయి సమాచారాన్ని సేకరిస్తున్నారని వర్గాలు చెబుతున్నాయి.

ముర్షిదాబాద్‌కు చెందిన రాష్ట్రీయ స్వయంసేవక్ సంఘ్ (ఆర్‌ఎస్‌ఎస్) నాయకుడు సఖరవ్ సర్కార్ ‘ది వైర్’తో మాట్లాడుతూ, “ప్రభుత్వం నిర్బంధ శిబిరాలను నిర్మించింది. అక్కడ ఉంచాల్సిన వారు రావడం ప్రారంభించారు. ఈ భవనాలు చాలా త్వరగా నిండిపోతాయని మేము భావిస్తున్నాము. చొరబాటుదారులను ఎలా ఏరివేయాలో అమిత్ షాకు తెలుసు. ఆ పని ప్రారంభమైంది.” అని అన్నారు.

లాల్‌గోలాలో, బహదూర్‌పూర్ పంచాయతీ సమీపంలోని పద్మ భవన్ ఒక పహారా కాసే నిర్బంధ కేంద్రంగా మారింది. కుష్టియాకు చెందినవారని భావిస్తున్న పదిహేను మంది అనుమానిత చొరబాటుదారులను బర్షతిగోలా, బిదుపూర్ మరియు సూతి నుండి అదుపులోకి తీసుకున్నారు. వారు పని కోసం ఏజెంట్ల ద్వారా ప్రవేశించారని పోలీసులు చెబుతున్నారు. హిలి మార్గం ద్వారా ప్రవేశించి గజోల్‌లో భిక్షాటన చేస్తున్నారనే ఆరోపణలపై ముగ్గురు మహిళలు, ఆరుగురు మైనర్లతో సహా తొమ్మిది మంది బంగ్లాదేశీయులను అదుపులోకి తీసుకున్నారు.

టీఎంసీ నాయకుడు, న్యాయవాది కృష్ణేందు నారాయణ్ చౌదరి మాట్లాడుతూ, “ఈ శిబిరాల గురించి భయాందోళనలు వ్యాపించిన మాట నిజమే. వారు భారతదేశానికి ఎందుకు వచ్చారనే దానిపై క్షుణ్ణంగా విచారణ జరపాలి. ఎవరైనా భిక్షాటన కోసం వస్తే అది వేరే విషయం. జీవనోపాధి కోసం లేదా మరేదైనా దురుద్దేశంతో వస్తే అది పూర్తిగా వేరే విషయం” అని అన్నారు.

పశ్చిమ బెంగాల్‌లోని ఈ కొత్త నిర్బంధ కేంద్రాలు, అస్సాంలోని ట్రాన్సిట్ క్యాంప్ వ్యవస్థతో పోలికలను రేకెత్తిస్తున్నాయి. అక్కడ విదేశీయుల ట్రిబ్యునల్స్, కోర్టు ఉత్తర్వులు, జాతీయ పౌర పట్టిక (NRC) ప్రక్రియ ద్వారా రూపొందించిన ఒక చట్రం కింద అనుమానిత విదేశీయులను నిర్బంధించారు.

అస్సాంలోని పాత నిర్బంధ విధానానికి భిన్నంగా, పశ్చిమ బెంగాల్ నమూనా జిల్లా స్థాయి పరిపాలనా ధృవీకరణ మరియు పోలీసు, సరిహద్దు దళాల మధ్య ప్రత్యక్ష సమన్వయంపై ఎక్కువగా ఆధారపడినట్లు కనిపిస్తోంది.

హక్కుల కార్యకర్త సుకాంత దాస్ మాట్లాడుతూ, “ఈ ప్రక్రియ ద్వారా ప్రజాస్వామ్యం ఊపిరాడకుండా చేసి, హత్యకు గురవుతోంది. మొదటగా, దాని పునాదిని బలహీనపరచడం ద్వారా, ఒక వర్గం ప్రజలపై అవమానకరమైన గుర్తింపును బలవంతంగా రుద్దుతున్నారు. స్వతంత్ర స్వరాలను అణచివేసే ఒక శక్తి అధికారంలోకి వచ్చింది. పౌరుడికి, శత్రువుకు మధ్య భేదాన్ని ఇకపై చట్టం నిర్ణయించడం లేదు, పూర్తిగా పాలకుల ఇష్టానుసారం నిర్ణయిస్తున్నారు. ఇది ఒక భయంకరమైన పరిస్థితి అని ఆయన వాపోయారు.”

బీర్‌భూమ్‌లోని పైకర్‌కు చెందిన సునాలి ఖాతున్ ఉదంతం ఈ భయాలను మరింత పెంచింది. శాశ్వత నివాసి అయినప్పటికీ, ఆమెను, ఆమె కుటుంబాన్ని బంగ్లాదేశీయులుగా ముద్రవేసి ఢిల్లీలో నిర్బంధించారు. వారిని చిత్రహింసలకు గురిచేసి బంగ్లాదేశ్‌లోకి నెట్టివేశారు, అక్కడ వారు 111 రోజులు అడవులలో, జైలులో గడిపారు. సునాలి తిరిగి వచ్చింది, కానీ ఆమె భర్త, పొరుగున ఉన్న స్వీటీ బీబీ, స్వీటీ ఇద్దరు పిల్లలు ఇంకా అక్కడే ఉన్నారు.

“మే 22న, నా భర్తను, నా ఇద్దరు కుమారులను, స్వీటీ బీబీని పది రోజుల్లోగా భారతదేశానికి తిరిగి తీసుకువచ్చి, వారి పౌరసత్వాన్ని ధృవీకరించాలని సుప్రీంకోర్టు ఇచ్చిన ఆదేశాన్ని నేను విన్నాను” అని సునాలి ‘ది వైర్’తో అన్నారు.

అయితే, సునాలిని తిరిగి తీసుకురావడానికి చొరవ తీసుకున్న టీఎంసీ ఎంపీ సమీరుల్ ఇస్లాం, “ఈ విషయంపై మేము ఇకపై సంప్రదింపులు జరపడం లేదు” అని పేర్కొన్నారు. ఈలోగా, న్యాయవాది సబ్యసాచి చటర్జీ, వారు భారత పౌరులని నిరూపించే పత్రరూప సాక్ష్యాలు ఇప్పటికే లభించాయని, సుప్రీంకోర్టు ఆదేశం ప్రకారం వారిని వెనక్కి తీసుకురావాలని నొక్కి చెప్పారు.

“సుప్రీంకోర్టు తీర్పు ప్రకారం, ప్రభుత్వం ముందుగా వారిని పది రోజుల్లోగా వెనక్కి తీసుకువచ్చి, ఆ తర్వాత వారి పత్రాలను ధృవీకరించాలి. వారు భారతీయులేనని నిరూపించే పత్రరూప సాక్ష్యాలు ఇప్పటికే లభించాయి. అలాంటప్పుడు, ఎలాంటి పత్రాలను ధృవీకరించకుండా బెంగాలీ మాట్లాడే భారతీయులను నేరుగా బంగ్లాదేశ్‌కు వెనక్కి పంపడం చట్టబద్ధమేనా?” అని చటర్జీ అన్నారు.

నిలుపుదల కేంద్రాలు (హోల్డింగ్ సెంటర్లు) అనే అధికారిక పదం క్షేత్రస్థాయి వాస్తవాన్ని కప్పిపుచ్చడంలో ఏమాత్రం సహాయపడలేదు. స్థానికంగా, ఈ భవనాలను ఇప్పటికే నిర్బంధ శిబిరాలుగా పరిగణిస్తున్నారు. పేద మైనారిటీ వర్గాలకు, ఓటర్ల జాబితా నుండి తొలగించబడిన వారికి, తమకు తెలిసిన ఏకైక మాతృభూమిలోనే పరాయివారిగా మారిపోతామనే భయం ఉంది.