వాషింగ్టన్: కెనడాలో ఖలిస్తానీ వేర్పాటువాది హర్దీప్ సింగ్ నిజ్జర్ హత్య నేపథ్యంలో… జైలులో ఉన్న గ్యాంగ్స్టర్ లారెన్స్ బిష్ణోయ్, అతని సన్నిహితుడు సతీందర్జీత్ సింగ్పై అమెరికా అభియోగాలు మోపింది. అమెరికా దర్యాప్తు సంస్థ FBI చేపట్టిన ‘ఆపరేషన్ హార్డ్బాల్’ ద్వారా, బిష్ణోయ్ ముఠాతో సంబంధాలున్న 24 మందిని అమెరికా, కెనడా, ఐరోపా దేశాల్లో అరెస్టు చేశారు.
అనేక దేశాలలో హత్య, దోపిడీ, మాదకద్రవ్యాల అక్రమ రవాణా, ఆయుధ నేరాలు, ఇతర వ్యవస్థీకృత నేర కార్యకలాపాలలో పాల్గొన్నట్లు ఆరోపణలు ఎదుర్కొంటున్న క్రిమినల్ సిండికేట్లను లక్ష్యంగా చేసుకుని అమెరికా ఈ అభియోగాలను మోపింది. ఈమేరకు అమెరికా న్యాయ శాఖ ప్రకారం, అధికారులు 50కి పైగా సెర్చ్ వారెంట్లను అమలు చేసి, కాలిఫోర్నియా, ఇండియానా, జార్జియా, కెనడా, స్పెయిన్లలో అనుమానితులను అరెస్టు చేశారు.
భారతదేశంతో సంబంధాలున్న మూడు వ్యవస్థీకృత నేర సమూహాలకు సంబంధించి మూడు వేర్వేరు ఫెడరల్ అభియోగపత్రాల కింద 37 మంది నిందితులపై అభియోగాలు మోపినట్లు న్యాయ శాఖ తెలిపింది. వీరిలో 24 మందిని అరెస్టు చేయగా, 10 మంది పరారీలో ఉన్నారు.
కోర్టు పత్రాల ప్రకారం, 2023 జూన్ 18న బ్రిటిష్ కొలంబియాలోని సర్రేలో ఒక సిక్కు దేవాలయం వెలుపల, అభియోగపత్రంలో “HSN”గా గుర్తించిన నిజ్జర్ను హత్య చేయమని బిష్ణోయ్, బ్రార్ ఆదేశించారు. కాగా, ఈ హత్యకు, భారత ప్రభుత్వ ఏజెంట్లకు సంబంధాలున్నాయని అప్పటి కెనడా ప్రధానమంత్రి జస్టిన్ ట్రూడో ఆరోపించడంతో, ఇది ఒక పెద్ద దౌత్య వివాదానికి దారితీసింది. ఈ ఆరోపణను న్యూఢిల్లీ కొట్టివేసింది.
అభియోగపత్రం ప్రకారం… బిష్ణోయ్ అక్రమ మొబైల్ ఫోన్లు, ఇంటర్నెట్ ఆధారిత కమ్యూనికేషన్ పరికరాలను ఉపయోగించి, పలు దేశాలలో రాజకీయ హత్యలు, దోపిడీలు, కిడ్నాప్లు, మాదకద్రవ్యాల అక్రమ రవాణా, మానవ అక్రమ రవాణా వంటి నేర కార్యకలాపాలను పర్యవేక్షించారు.
సిండికేట్ ఉత్తర అమెరికా నాయకుడిగా ఉన్న గోల్డీ బ్రార్, యూరప్లోని కార్యకలాపాలను పర్యవేక్షించాడని ఆరోపణలు ఉన్న రోహిత్ను కూడా ప్రాసిక్యూటర్లు కీలక సహచరులుగా పేర్కొన్నారు. అభియోగపత్రం ప్రకారం, ఈ ఇద్దరు వ్యక్తులు భారతదేశం వెలుపల ముఠా కార్యకలాపాలను సమన్వయం చేయడంలో సహాయపడ్డారు.
ప్రాసిక్యూటర్ల ప్రకారం, జూన్ 23న దాఖలు చేసిన ఎనిమిది అభియోగాల పత్రంలో ధండాతో పాటు, బ్రిటిష్ కొలంబియాలోని సర్రేకు చెందినజస్కార్న్ బగ్రీ, గుర్తేజ్ సింగ్ సహా మరో ఎనిమిది మంది నిందితులపై అభియోగాలు మోపారు. గాలింపులో భాగంగా, దర్యాప్తు అధికారులు శాక్రమెంటో ప్రాంతంలో 23, లాస్ ఏంజిల్స్లో 11 సహా డజన్ల కొద్దీ సెర్చ్ వారెంట్లను కూడా అమలు చేశారు.
