హైదరాబాద్: నగరంలోని కాసు బ్రహ్మానంద రెడ్డి జాతీయ పార్క్ పక్కనుంచి ప్రయాణించే వాహనదారులకు ట్రాఫిక్ పోలీసులు ఏర్పాటుచేసిన వన్‌ వే ఒక పీడకలగా మారింది. ఉదయం రద్దీ వేళల్లో రోడ్లు వాహనాలతో కిక్కిరిసిపోయాయి. వందల మీటర్ల మేర కార్లు, ద్విచక్ర వాహనాలు బారులు తీరడంతో వాహనదారులు తీవ్ర అవస్థలు పడ్డారు. హెచ్-సీఐటీఐ ప్రాజెక్టులో భాగంగా చేపట్టనున్న మౌలిక వసతుల పనులకు వీలుగా, ట్రాఫిక్‌ను సులభతరం చేయాలనే ఉద్దేశంతో హైదరాబాద్ ట్రాఫిక్ పోలీసులు కేబీఆర్ పార్క్ చుట్టూ నిన్ను ఉదయం 6 గంటల నుంచి వన్‌వే విధానాన్ని అమలు చేశారు. అయితే ఆచరణలో మాత్రం పరిస్థితి అందుకు భిన్నంగా కనిపించింది.

ట్రాఫిక్ సాఫీగా సాగేందుకు రహదారిని వన్‌వేగా మార్చినప్పటికీ, చుట్టుపక్కల ప్రాంతాల్లో దాదాపు కిలోమీటరు మేర వాహనాలు ఒకదానికొకటి ఆనుకుని నిలిచిపోయాయి. సాధారణంగా 15 నిమిషాల్లో పూర్తయ్యే ఈ ప్రయాణానికి, ఉదయం, సాయంత్రం రద్దీ వేళల్లో 45 నుంచి 50 నిమిషాలు, అంతకంటే ఎక్కువ సమయం పట్టిందని ప్రయాణికులు తెలిపారు.

కేబీఆర్ పార్క్ చుట్టూ కొత్త వన్‌వే వ్యవస్థను అమలు చేసిన మొదటి రోజే ట్రాఫిక్ నత్తనడకన సాగడంతో వాహనదారులు తీవ్ర జాప్యాన్ని ఎదుర్కొన్నారు. ఇప్పటికే ప్రధాన సిగ్నళ్ల వద్ద రద్దీతో ఉన్న కేబీఆర్ పార్క్ చుట్టూ ఉన్న ఆరు లేన్ల రహదారి, ఒక భారీ ట్రాఫిక్ జామ్‌గా మారింది. వాహనాలను కొత్త వన్ వే లోకి మళ్లించడంతో, పొడవైన క్యూలు ఏర్పడ్డాయి. వాహనదారులు సవరించిన ట్రాఫిక్ విధానాన్ని అర్థం చేసుకోవడానికి ఇబ్బంది పడ్డారు.

కొత్త ఏర్పాటు వల్ల తమ ప్రయాణ సమయం గణనీయంగా పెరిగిందని పలువురు ప్రయాణికులు తెలిపారు. “సాధారణంగా 15 నిమిషాలు పట్టే మార్గానికి ఈరోజు మాకు 45 నుంచి 50 నిమిషాలు పట్టింది. చాలా చోట్ల ట్రాఫిక్ చాలా నెమ్మదిగా కదులుతోంది,” అని మంగళవారం ఉదయం కేబీఆర్ పార్క్ మార్గం గుండా ప్రయాణించిన ఒక వాహనదారుడు అన్నారు. మొదటి రోజు నెలకొన్న గందరగోళం రద్దీని మరింత పెంచిందని మరో ప్రయాణికుడు అన్నారు.

“నిర్మాణ పనుల కారణంగా ఈ వ్యవస్థను ప్రవేశపెట్టారని మాకు అర్థమైంది, కానీ వాహనాలను మళ్లిస్తున్న చోట్ల స్పష్టమైన లేన్ మార్గనిర్దేశం, మెరుగైన ట్రాఫిక్ నిర్వహణ ఉండాలి,” అని ఒక ప్రయాణికుడు అన్నారు. ఈ కొత్త ఏర్పాటు ప్రకారం, వాహనదారులు పాత యూ-టర్న్‌లు లేదా కుడి మలుపులు తీసుకుని తమ పాత మార్గాల్లోకి తిరిగి వెళ్లడానికి వీలు లేదు. దానికి బదులుగా, వాహనాల రాకపోకలను నియంత్రించడానికి ప్రత్యేకంగా లేన్ మార్చే మార్గాలు, మధ్యలో ఖాళీలు, నిష్క్రమణ మార్గాలను ఏర్పాటు చేశారు. షార్ట్‌కట్‌లు ప్రయత్నించే బదులు, ఆ మార్గంలో ఉన్న సిబ్బంది ఇచ్చే సూచనలు, సైన్‌బోర్డులను పాటించాలని ట్రాఫిక్ పోలీసులు వాహనదారులకు సూచించారు. హైదరాబాద్ నగర పోలీస్ కమిషనర్ వీసీ సజ్జనార్ వివిధ ప్రాంతాల్లో బైక్‌పై ట్రాఫిక్ వ్యవస్థను సమీక్షించారు. జాయింట్ సీపీ (ట్రాఫిక్) డి. జోయల్ డేవిస్, పరిస్థితిని పర్యవేక్షించారు.