రియాద్: సౌదీ అరేబియా రాజధాని రియాద్‌లో భారీ పేలుళ్ల శబ్దాలు వినిపించాయి. యెమెన్‌కు చెందిన హౌతీ తిరుగుబాటుదారులు రియాద్‌లోని కింగ్ ఖాలిద్ అంతర్జాతీయ విమానాశ్రయం, ఇతర వ్యూహాత్మక ప్రాంతాలను లక్ష్యంగా చేసుకుని బాలిస్టిక్ క్షిపణులు, డ్రోన్లతో వరుస దాడులకు తెగబడ్డారు. దీంతో సౌదీ గగనతలంలో ముప్పు పొంచి ఉందని హెచ్చరిస్తూ స్థానికులకు అత్యవసర హెచ్చరికలు జారీ చేశారు. ఆ తర్వాత సోమవారం రాత్రి పలు పేలుళ్లు వినిపించాయని ఏఎఫ్‌పీ నివేదించింది.
హౌతీ తిరుగుబాటుదారులు రియాద్ వైపు ప్రయోగించిన బాలిస్టిక్ క్షిపణిని అడ్డుకుని, ధ్వంసం చేసినట్లు సంకీర్ణ దళాల ప్రతినిధి మేజర్ జనరల్ తుర్కీ అల్-మాలికీ ‘X’ ద్వారా తెలిపారు. సౌదీ పౌర రక్షణ శాఖ కూడా ‘X’ ఛానెల్ ద్వారా ముందస్తు హెచ్చరికల వేదిక (నేషనల్ ఎర్లీ వార్నింగ్ ప్లాట్‌ఫామ్) ద్వారా రాబోయే ప్రమాదం గురించి హెచ్చరించింది. అధికారిక భద్రతా సూచనలను పాటించాలని వారిని కోరింది.
“ఈ ప్రాంతం గగనతలంలో శత్రు ముప్పులో ఉంది. దయచేసి ప్రశాంతంగా ఉండండి, ఇళ్లలోనే ఉండండి లేదా కిటికీలు, తలుపులకు దూరంగా సురక్షితమైన ప్రదేశంలో ఉండండి,” అని అత్యవసర హెచ్చరికలో పేర్కొన్నారు.
ప్రమాదం తొలగిపోయే వరకు భవనంలోని సురక్షిత ప్రదేశానికి వెళ్లాలని, కిటికీలకు దూరంగా ఉండాలని, ఇళ్లలోనే ఉండాలని ప్రజలకు సూచించారు. ప్రమాదం తొలగిపోయిందని సౌదీ పౌర రక్షణ శాఖ తరువాత ప్రకటించింది. అయితే, స్థానికులు భద్రతా సూచనలను పాటించడం కొనసాగించాలని, గుంపులుగా చేరడం, వీడియోలు తీయడం వంటివి మానుకోవాలని కోరింది.
సౌదీ విమానాశ్రయాలపై హౌతీ దాడులు తీవ్రమవుతున్న తరుణంలో ఈ ఘటన చోటుచేసుకుంది. దీనివల్ల విమాన రాకపోకలు, ప్రయాణీకుల భద్రతపై పడే ప్రభావం గురించి ఆందోళనలు పెరుగుతున్నాయి. రియాద్‌లోని కింగ్ ఖలీద్ అంతర్జాతీయ విమానాశ్రయంపై ఐదు రోజుల్లో నాలుగు సార్లు దాడులు జరిగినట్లు సమాచారం. అలాగే, ఆ విమానాశ్రయం సమీపంలోకి వచ్చిన ఒక క్రూయిజ్ క్షిపణిని సౌదీ వైమానిక రక్షణ దళాలు అడ్డుకున్నాయి.
సౌదీ పౌర విమానయాన అధికారుల ప్రకారం… విమానాశ్రయంలోని టెర్మినల్ 4పై గుర్తుతెలియని ఒక క్షిపణి పడటంతో మంటలు చెలరేగి ఒక వ్యక్తి మరణించగా, మరో 11 మంది గాయపడ్డారు. అంతకుముందు జరిగిన మరో ఘోరమైన దాడిలో ఒక భారతీయ జాతీయుడితో సహా 13 మంది మరణించిన సంగతి విదితమే.
