వాషింగ్టన్: అమెరికా మధ్యంతర ఎన్నికల్లో డెమోక్రాట్ల విజయభేరీ మోగించారు. యూఎస్ సెనేట్‌ను, ప్రతినిధుల సభను తిరిగి తమ నియంత్రణలోకి తీసుకున్నారు. ఇది రిపబ్లికన్లకు గట్టి ఎదురుదెబ్బ. అలాగే, అధ్యక్షుడు డొనాల్డ్ ట్రంప్‌కు వ్యతిరేకంగా కాంగ్రెస్‌లో ఒక కొత్త శకానికి నాంది పలికినట్లైంది.
మంగళవారం ముగిసిన మధ్యంతర ఎన్నికలు, అధిక ధరలు, ఇరాన్‌తో యుద్ధం, ప్రభుత్వ అవినీతిపై ఆందోళనల పట్ల ఓటర్లలో ఉన్న తీవ్ర అసంతృప్తిని ప్రతిబింబించాయి. కాగా, సెనేట్‌పై డెమోక్రాట్ల నియంత్రణ, ట్రంప్ పదవీకాలంలోని చివరి రెండేళ్లను సమూలంగా మార్చేస్తుంది.
అంతేకాదు సుప్రీంకోర్టులో సంప్రదాయవాద మార్పును కొనసాగించాలనే ట్రంప్ ఆశలతో సహా, తన అజెండాను ముందుకు తీసుకెళ్లే ఆయన సామర్థ్యాన్ని ఇది దెబ్బతీసే అవకాశం ఉంది. డెమోక్రాట్ల అజెండాను అడ్డుకోవడానికి తన వీటో అధికారాన్ని ఉపయోగిస్తానని ట్రంప్ ఇప్పటికే పేర్కొనడంతో… పాలనలో ప్రతిష్టంభన ఏర్పడే అవకాశాన్ని సూచిస్తోంది.
సాంప్రదాయకంగా రిపబ్లికన్లకు గట్టి పట్టున్న రాష్ట్రాల్లో డెమోక్రాట్ల అద్భుతమైన విజయాలు సాధించారు. ఈ పరంపరలో భాగంగా, అయోవాలో జోష్ టురెక్ ప్రతినిధి ఆష్లీ హిన్సన్‌ను ఓడించగా, కాన్సాస్‌లో ఆడమ్ హామిల్టన్ సెనేటర్ రోజర్ మార్షల్‌ను ఓడించారు. ఈ స్థానంలో వందేళ్ల తరువాత డెమోక్రాట్లు గెలవడం విశేషం. టెక్సాస్‌లో జేమ్స్ తలారికో కెన్ పాక్స్‌టన్‌ను ఓడించగా, సౌత్ కరోలినాలో యానీ ఆండ్రూస్ డార్లిన్ గ్రాహమ్‌పై అనూహ్య విజయం సాధించారు, ఒహాయోలో షెరాడ్ బ్రౌన్ సెనేటర్ జాన్ హస్టెడ్‌ను ఓడించారు, రాయ్ కూపర్ నార్త్ కరోలినాలో ఖాళీగా ఉన్న స్థానాన్ని కైవసం చేసుకున్నారు.
జార్జియాలో డెమోక్రటిక్ సెనేటర్ జాన్ ఓసాఫ్, ప్రతినిధి మైక్ కాలిన్స్‌ను ఓడించి తిరిగి ఎన్నికయ్యారు. తద్వారా, ఒకప్పుడు రిపబ్లికన్లు కైవసం చేసుకుంటామని భావించిన స్థానాన్ని వారికి దక్కకుండా చేశారు. న్యూ హాంప్‌షైర్‌లో జరిగిన సెనేట్ ఎన్నికల్లో, ప్రతినిధి క్రిస్ పాప్పాస్ మాజీ సెనేటర్ జాన్ సునునును ఓడించి, పదవీ విరమణ చేస్తున్న డెమోక్రటిక్ సెనేటర్ జీన్ షాహీన్ స్థానాన్ని భర్తీ చేశారు.
ప్రతినిధుల సభలో, కీలకమైన పోటీ స్థానాలలో ఆరుగురు రిపబ్లికన్లను ఓడించిన తర్వాత డెమోక్రటిక్ పార్టీ నియంత్రణ సాధించింది. న్యూజెర్సీకి చెందిన రిపబ్లికన్ ప్రతినిధి టామ్ కీన్, పెన్సిల్వేనియాలోని ముగ్గురు రిపబ్లికన్లు, ర్యాన్ మెకెంజీ, స్కాట్ పెర్రీ, రాబ్ బ్రెస్నాహన్ తిరిగి ఎన్నికల్లో ఓడిపోయారు. నార్త్ కరోలినా, కెంటకీలలో ఖాళీగా ఉన్న స్థానాలను డెమోక్రటిక్ పార్టీ గెలుచుకుంది.
కాగా, ఈ ఎన్నికలు వాషింగ్టన్‌లో అధికారాన్ని సమూలంగా మార్చివేస్తాయి. ద్రవ్యోల్బణాన్ని అరికట్టడంలో ట్రంప్ విఫలమవడంపై ఉన్న అసంతృప్తి, పెట్రోల్ పంపుల వద్ద ప్రజల బాధలను తగ్గించడం కంటే దేశ రాజధానిని సుసంపన్నం చేయడంపైనే ఆయన ఎక్కువ దృష్టి పెట్టారనే అభిప్రాయాలతో పరిస్థితిని డెమోక్రాట్లకు అనుకూలంగా మారింది.
