వాషింగ్టన్: ఇరాన్‌లోలో మిగిలిన భాగాన్ని పూర్తిగా “నాశనం” చేస్తానని అమెరికా అధ్యక్షుడు డొనాల్డ్ ట్రంప్ హెచ్చరించిన నేపథ్యంలో, టెహ్రాన్ అమెరికాకు ఒక కీలక అణు ప్రతిపాదనను పంపింది. ఖతార్ మధ్యవర్తిత్వంతో ఈ ప్రతిపాదనను పంపినట్లు, ఇరాన్ విధించిన ఏడు డిమాండ్లను వాషింగ్టన్ నెరవేర్చిన తర్వాతే దీనిపై చర్చిస్తామని ఒక సీనియర్ ఇరాన్ అధికారిని ఉటంకిస్తూ రాయిటర్స్ వార్తా సంస్థ నివేదించింది.
పేరు వెల్లడించడానికి నిరాకరించిన ఆ అధికారి.. వాషింగ్టన్ ప్రస్తుతం ఈ ప్రతిపాదనను పరిశీలిస్తోందని వెల్లడించారు కానీ, దానికి సంబంధించిన మరిన్ని వివరాలు మాత్రం తెలపలేదు.
ఈ వారం ప్రారంభంలో ఇరాన్ ఉన్నత భద్రతా అధికారి మొహ్సెన్ రెజాయీ మాట్లాడుతూ…దౌత్యపరంగా మేము అమెరికన్లకు ఏడు షరతులను స్పష్టం చేశాము. వారు మా షరతులను అమలు చేసేవరకు హర్ముజ్ జలసంధిని తెరవబోము, ఎలాంటి చర్చలకు అంగీకరించబోము”* అని తేల్చిచెప్పారు.
ఇరాన్ విధించిన ఆ 7 షరతులు ఏమిటంటే…
ఇరాన్ తన షరతుల అధికారిక జాబితాను పూర్తిస్థాయిలో బహిరంగపరచలేదు. అయితే, ‘ఖలీజ్ టైమ్స్’ నివేదిక ప్రకారం టెహ్రాన్ డిమాండ్లలో ముఖ్యమైనవి ఇవే ఉండే అవకాశం ఉంది:
- లెబనాన్‌తో సహా శత్రుత్వాలకు పూర్తిగా ముగింపు పలకడం.
- ఇరాన్ ఓడరేవులపై అమెరికా నావికా దిగ్బంధనాన్ని ఎత్తివేయడం.
- ఇరాన్‌పై విధించిన అన్ని రకాల ఆంక్షలను తొలగించడం.
- విదేశాల్లో స్తంభింపజేసిన ఇస్లామిక్ రిపబ్లిక్ ఆస్తులను విడుదల చేయడం.
- ఈ ప్రాంతంలో అమెరికా సైనిక ఉనికిని గణనీయంగా తగ్గించడం.
- యుద్ధ సంబంధిత నష్టాలకు పరిహారం చెల్లించడం.
- ఇరాన్ భూభాగంపై భవిష్యత్తులో అమెరికా దాడులను పూర్తిగా నిలిపివేయడం.
మరోవైపు, ఏవైనా ప్రాథమిక చర్చలలో అణు సంబంధిత అంశాలు తప్పనిసరిగా చర్చకు రావాలని వాషింగ్టన్ స్పష్టం చేస్తోంది.
ట్రంప్ హెచ్చరికలు – పెరుగుతున్న యుద్ధ భయాలు
అమెరికా మధ్యంతర ఎన్నికల తర్వాత పశ్చిమాసియాలో మళ్లీ యుద్ధం రాజుకుంటుందనే ఆందోళనలు వ్యక్తమవుతున్నాయి. ఎన్నికల అనంతరం పోరాట కార్యకలాపాలు తిరిగి ప్రారంభమయ్యే అవకాశాన్ని ట్రంప్ తోసిపుచ్చకపోవడం, మరోవైపు యుద్ధం మళ్లీ మొదలైతే తీవ్రమైన ప్రతీకార చర్యలకు ఇరాన్ ప్రణాళికలు రచిస్తుండటం ఈ భయాలను మరింత పెంచుతున్నాయి. ఈ తరుణంలో ఇరాన్-అమెరికా మధ్య ఘర్షణను నివారించడానికి మధ్యవర్తులు తమ ప్రయత్నాలను ముమ్మరం చేశారు.
గతంలో ఫిబ్రవరి 28న అమెరికా, ఇజ్రాయెల్ సంయుక్తంగా ఇరాన్‌పై దాడులు జరపగా.. దానికి ప్రతిస్పందనగా ఇరాన్.. ఇజ్రాయెల్, మరియు అమెరికా సైనిక స్థావరాలున్న గల్ఫ్ దేశాలపై దాడులకు దిగింది. అలాగే లెబనాన్‌లో ఇరాన్ మద్దతుగల హిజ్బుల్లాకు, ఇజ్రాయెల్‌కు మధ్య ఘర్షణ చెలరేగింది. ఇటీవలే ఈ ఉద్రిక్తతలు యెమెన్‌కు కూడా పాకగా, అక్కడి ఇరాన్ అనుకూల హౌతీలు సౌదీ అరేబియాలోని ఇంధన కేంద్రాలు, విమానాశ్రయాలు తదితర కీలక లక్ష్యాలపై దాడులకు పాల్పడిన విషయం తెలిసిందే.
