హైదరాబాద్: హైదరాబాదీలకు తెలంగాణ ప్రభుత్వం దీపావళి కానుక ప్రకటించింది. మెట్రో, ఆర్టీసీ (RTC) ఉమ్మడి ప్రయాణ పాసు ధరలను గణనీయంగా తగ్గించింది. రోజువారీ ఉమ్మడి పాసు ధరను రూ. 400 నుండి రూ. 275కి తగ్గించారు. ఇందులో మెట్రో ప్రయాణానికి రూ. 200, ఆర్టీసీ సేవలకు రూ. 75 కేటాయించారు. ఈ పాసు ద్వారా రోజుకు నాలుగుసార్లు ప్రయాణించే అవకాశం ఉంటుంది.
అలాగే, నెలవారీ పాసు ధరను రూ. 8,500 నుండి రూ. 4,000కి తగ్గించారు. ఇందులో మెట్రో ప్రయాణానికి రూ. 3,000, ఆర్టీసీ సేవలకు రూ. 1,000 కేటాయించారు. ఈ పాసుతో నెలకు 50 రాకపోకలు (రౌండ్ ట్రిప్పులు) జరుపవచ్చు.
ఈ సవరించిన ధరల వల్ల ప్రయాణికులకు రోజువారీ పాసుపై రూ. 125, నెలవారీ పాసుపై రూ. 4,500 ఆదా అవుతుందని రవాణా శాఖ మంత్రి పొన్నం ప్రభాకర్ తెలిపారు. ఈ కొత్త ధరలు నవంబర్ 8 నుండి అమల్లోకి వస్తాయి. ప్రయాణికులపై ఉన్న ఆర్థిక భారాన్ని తగ్గించేందుకు, ప్రజా రవాణా వ్యవస్థను మరింత అందుబాటులోకి తీసుకువచ్చేందుకు ఈ నిర్ణయం తీసుకున్నట్లు ఆయన పేర్కొన్నారు.
కాగా, మెట్రో, ఆర్టీసీ ప్రయాణాల కోసం ఒకే కార్డును వినియోగించే ఈ కామన్ పాస్‌ను అక్టోబర్ ప్రారంభంలో ప్రవేశపెట్టారు. అయితే, అప్పట్లో నిర్ణయించిన ధరలు చాలా ఎక్కువగా ఉన్నాయని ప్రయాణికుల నుంచి విమర్శలు వచ్చాయి. ఈ నేపథ్యంలో ప్రభుత్వం ధరలను తగ్గిస్తూ నిర్ణయం తీసుకోవడం గమనార్హం.
మొత్తమ్మీద పాసు ధరలు తగ్గింపుతో మెట్రో స్టేషన్ వరకూ ఆర్టీసీలో బస్సుల్లో వచ్చి, అక్కడి నుండి మెట్రోలో గమ్యస్థానానికి వెళ్లేవారికి విడివిడిగా టికెట్లు తీసుకునే శ్రమ తప్పుతుంది. వ్యక్తిగత వాహనాల్లో పెట్రోల్ ఖర్చులతో పోలిస్తే నెలవారీ రూ. 4,000 పాస్ ఐటీ ఉద్యోగులకు, రోజువారీ వ్యాపారులకు ఎంతో లాభదాయకం. చౌకైన ఉమ్మడి పాస్‌ల వల్ల ప్రైవేట్ వాహనాల వినియోగం తగ్గి, నగరంలో కాలుష్యం, ట్రాఫిక్ సమస్యలు తగ్గుతాయని రవాణారంగ నిపుణులు చెబుతున్నారు.
