Recent News

Copyright © 2024 Blaze themes. All Right Reserved.

పోషకాహార, ప్రసూతి పథకాలు నీరుగారుతున్నాయి…హెచ్చరించిన కార్యకర్తలు!

Share It:

న్యూఢిల్లీ: బాలల దినోత్సవం (నవంబర్ 14) సందర్భాన్ని పురస్కరించుకుని, ‘ది రైట్ టు ఫుడ్ క్యాంపెయిన్’ మరియు ‘రోజీ-రోటీ అధికార్ అభియాన్’ సంయుక్తంగా నిర్వహించిన పత్రికా సమావేశం దేశంలో పిల్లల పోషకాహారం, మహిళల ప్రసూతి హక్కుల వాస్తవ పరిస్థితిని మరోసారి కళ్లకు కట్టింది. అక్టోబర్ 1-3 తేదీలలో భోపాల్‌లో జరిగిన మూడు రోజుల ‘పిల్లల ఆహార హక్కుపై జాతీయ సదస్సు’లో వెల్లడైన అధ్యయన ఫలితాల ఆధారంగా ఈ సమావేశం కొనసాగింది. దేశంలోని 16 రాష్ట్రాల నుండి వచ్చిన కార్యకర్తలు, ప్రచారకర్తలు ఈ సదస్సులో భాగస్వామ్యమయ్యారు.

ప్రముఖుల ఆందోళనలు
ఈ సమావేశంలో అభివృద్ధి ఆర్థికవేత్త దీపా సిన్హా, ప్రముఖ సామాజిక కార్యకర్త అంజలి భరద్వాజ్, కమ్యూనిటీ పీడియాట్రిషియన్ డాక్టర్ వందనా ప్రసాద్, పరిశోధకురాలు సుదేష్ణ తదితరులు ప్రసంగించారు. పిల్లల పోషకాహార లోపం, ప్రభుత్వ సేవల వైఫల్యాలు, జీవనోపాధి కొరత, అలాగే భూమి మరియు వనరుల లభ్యత లేకపోవడానికి మధ్య ఉన్న ప్రత్యక్ష సంబంధాన్ని వీరు చర్చించారు. క్షేత్రస్థాయిలో ప్రభుత్వ పథకాలు అమలు తీరు ఆశించిన స్థాయిలో లేకపోవడంపై వారు తీవ్ర ఆందోళన వ్యక్తం చేశారు.

ప్రధాన డిమాండ్లు
ఈ సందర్భంగా కార్యకర్తలు, నిపుణులు ప్రభుత్వాన్ని అప్రమత్తం చేస్తూ పలు కీలక డిమాండ్లను తెరపైకి తెచ్చారు. పోషకాహార, ప్రసూతి పథకాలకు కేటాయించే బడ్జెట్ నిధులను గణనీయంగా పెంచాలని డిమాండ్‌ చేశారు. అంతేకాదు పథకాల అమలులో పారదర్శకతను పాటించడంతో పాటు, పర్యవేక్షణ వ్యవస్థను మరింత పటిష్టం చేయాలని సూచించారు. లబ్ధిదారులు సంక్షేమ పథకాల ప్రయోజనాలను ఎటువంటి ఇబ్బందులు లేకుండా సులభంగా పొందేలా నిబంధనలను సరళతరం చేయాలన్నారు. అలాగే అసంఘటిత రంగంలో పనిచేస్తున్న శ్రామిక మహిళలందరికీ ప్రసూతి ప్రయోజనాలను ఒక చట్టబద్ధమైన హక్కుగా గుర్తించాలని సిఫార్సు చేశారు. శిశు సంరక్షణకు అవసరమైన సౌకర్యాలను మెరుగుపరచడంతో పాటు, స్థానికంగా లభించే పౌష్టికాహారానికి ప్రభుత్వాలు మరింత మద్దతు, ప్రోత్సాహం అందించాలని కోరారు.

మొత్తంగా ఒక దేశ భవిష్యత్తు ఆ దేశంలోని పిల్లల ఆరోగ్యం, పోషకాహారం, మహిళల సంక్షేమంపైనే ఆధారపడి ఉంటుంది. ప్రభుత్వాలు ఎన్ని పథకాలు ప్రవేశపెట్టినప్పటికీ, వాటి ఫలాలు అట్టడుగు వర్గాలకు సక్రమంగా చేరినప్పుడే సమాజంలో నిజమైన మార్పు వస్తుంది. కార్యకర్తలు లేవనెత్తిన ఈ అంశాలను పరిగణలోకి తీసుకుని, ప్రభుత్వాలు జవాబుదారీతనంతో వ్యవహరిస్తూ, పోషకాహార, ప్రసూతి ప్రయోజన చట్టాలను మరింత పటిష్టంగా అమలు చేయాల్సిన అవసరం ఎంతైనా ఉంది.

Tags :

Grid News

Latest Post

వర్తమానం ఒక ప్రముఖ తెలుగు వెబ్ పత్రిక. డిజిటల్ రంగంలో నిజాయితీ, పారదర్శకత, విశ్వసనీయతతో కూడిన వార్తలను ప్రజలకు అందించడమే లక్ష్యంగా ఏర్పాటైంది.

Latest News

Most Popular

Copyright © 2024 Vartamanam. All Right Reserved.