బెర్లిన్: జర్మనీలోని మోయర్స్ నగరంలోని డ్యూయిస్బర్గ్ ప్రాంతంలో ఒక గురుద్వారాలో చెలరేగిన హింసాత్మక ఘర్షణలో కనీసం 11 మంది గాయపడ్డారు. ఆ గురుద్వారా లోపల తీసినట్లుగా భావిస్తున్న వీడియోలలో రెండు వర్గాల మధ్య తీవ్ర ఘర్షణ జరిగినట్లు కనిపిస్తోంది. ఈ ఘర్షణలో కత్తులు, కిర్పాన్లతో సహా పదునైన వస్తువులను ఉపయోగించార.
ఈ ఘర్షణలో సుమారు 40 మంది పాల్గొనడంతో, ప్రత్యేక పోలీసు వ్యూహాత్మక బృందాలను మోహరించడంతో సహా భారీ స్థాయిలో పోలీసులు స్పందించారని జర్మన్ వార్తాపత్రిక ‘బిల్డ్’ నివేదించింది. సాక్షులు తెలిపిన వివరాల ప్రకారం, ఆ గురుద్వారా లోపల పదునైన ఆయుధాలతో పాటు పెప్పర్ స్ప్రే, తుపాకీని కూడా ఉపయోగించారు.
ఈ రక్తపాత ఘర్షణకు ఖచ్చితమైన కారణంపై దర్యాప్తు జరుగుతోంది. అయితే ప్రాథమిక విచారణ అనంతరం, కొత్త బోర్డ్ ఆఫ్ డైరెక్టర్ల ఎన్నిక కారణంగా ఈ వివాదాలు తలెత్తి ఉండవచ్చని పోలీసులు తెలిపారు. ఈ వివాదాలలో గురుద్వారా నిధులకు సంబంధించిన అంశాలు కూడా ఉన్నాయని, వాటిని వివిధ వర్గాలు తమవిగా క్లెయిమ్ చేస్తున్నాయని సమాచారం.
సోమవారం జరిగిన ఈ దారుణ ఘర్షణను ప్రత్యక్షంగా చూసిన 56 ఏళ్ల గురుద్వారా సభ్యుడు ‘బిల్డ్’ పత్రికతో మాట్లాడుతూ, “ఇది ఖచ్చితంగా పథకం ప్రకారం జరిగి ఉండాలి. ప్రార్థన ప్రారంభం కావడానికి కొద్దిసేపటి ముందు, దాడి చేసినవారు అకస్మాత్తుగా పెప్పర్ స్ప్రే తీసుకుని తమ ప్రత్యర్థులపై చల్లారు. ఆ తర్వాత వారిలో ఒకరు పిస్టల్తో కాల్పులు జరిపారు. నేను కత్తులను కూడా చూశాను,” అని తెలిపారు.
గురుద్వారా నిధుల నిర్వహణ విషయంలో మాజీ, ప్రస్తుత బోర్డు సభ్యుల మధ్య విభేదాలు ఉన్నాయని వారు చెప్పారు. ఇక్కడ ఆలయంలో పలుకుబడి, తుది నిర్ణయం ఎవరిదనే దాని గురించే “కొంతకాలంగా సమస్యలు, వివాదాలు ఉన్నాయి. దాడి ప్రారంభమైనప్పుడు, చాలామంది భయంతో ఆలయం నుండి పారిపోయారు; లేకుంటే పరిస్థితి ఇంకా ఘోరంగా ఉండేది. అదృష్టవశాత్తు, ఎవరి ప్రాణాలకు ప్రమాదం లేదు,” అని ఆ ప్రత్యక్ష సాక్షి తెలిపారు.
బిల్డ్ నివేదిక ప్రకారం, ఈ ఘర్షణలో పదకొండు మంది గాయపడ్డారు. గాయపడిన వారికి సంఘటనా స్థలంలోనే పారామెడిక్స్, అత్యవసర వైద్యుడు చికిత్స అందించారు. ఒక అనుమానితుడికి పోలీసులు సంకెళ్లు వేసి పెట్రోలింగ్ కారులో ఎక్కించారు. అసలు ఎవరు ఎవరిపై దాడి చేశారనే విషయాన్ని నిర్ధారించడానికి ఇన్వెస్టిగేషన్ జరుగుతోంది.
తుపాకీ ఇంకా లభ్యం కాలేదు, కానీ దొరికిన తూటాల ఆధారంగా, అది ఖాళీ గుండ్లతో కాల్చే పిస్టల్ అని ప్రాథమిక అంచనాలు సూచిస్తున్నాయి. ఈ ఘటనపై క్రిమినల్ ఇన్వెస్టిగేషన్ విభాగం దర్యాప్తు చేస్తోంది.
ఘర్షణకు సంబంధించిన వీడియో లింక్
