న్యూఢిల్లీ: లోక్‌సభ ప్రతిపక్ష నాయకుడు రాహుల్ గాంధీ నిన్న ఢిల్లీలోని యమునా నది ఒడ్డున ఉన్న బేలా ఎస్టేట్ (Bela Estate) మురికివాడను సందర్శించారు. అక్కడ జరుగుతున్న స్పెషల్ ఇంటెన్సివ్ రివిజన్ (SIR) ఓటర్ల జాబితా సవరణ ప్రక్రియలో భాగంగా, మొత్తం 729 మంది ఓటర్లలో 728 మంది పేర్లను తొలగించి కేవలం ఒక్కరి పేరు మాత్రమే జాబితాలో ఉంచడంపై ఆయన తీవ్ర ఆగ్రహం వ్యక్తం చేశారు.

రాహుల్ గాంధీ.. బేల ఎస్టే‌ట్ ప్రజల మనోవేదనలను విన్నారు. వారి పేర్లను తొలగించడానికి గల కారణాన్ని ప్రశ్నిస్తూ… ఫోన్‌లో సబ్-డివిజనల్ మేజిస్ట్రేట్ (SDM)తో కూడా మాట్లాడారు. ఈమేరకు సోషల్ మీడియాలో షేర్ చేసిన వీడియోలో, ప్రస్తుతం 728 మంది బెలా ఎస్టేట్‌లో నివసిస్తున్నారని, అయితే సర్ తర్వాత ఓటరు జాబితాలో ఒక పేరు మాత్రమే మిగిలి ఉందని, మిగిలిన 727 మంది తొలగించారని చెప్పారు. “యమునా ఒడ్డున ఉన్న బేలా ఎస్టేట్‌లో 728 మంది నివసిస్తున్నారు. సర్ తర్వాత, ఓటరు జాబితాలో ఒక పేరు మాత్రమే మిగిలి ఉంది – మిగిలిన 727 పేర్లు కొట్టేసారని గాంధీ చెప్పారు. వీరంతా దశాబ్దాలుగా ఈ ప్రాంతంలో నివసిస్తున్నారని, 2024 లోక్‌సభ, 2025 ఢిల్లీ అసెంబ్లీ ఎన్నికలలో ఓటు వేశారని ఆయన పేర్కొన్నారు. 2023లో వారి ఇళ్లను కూల్చివేశారని, అయినా వీరు ఈ ప్రాంతంలో నివసించడం కొనసాగించారని ఆయన చెప్పారు. “ఈ రోజు నేను వారి మురికివాడకు వెళ్లి… ఎన్నికల సంఘం వారికి ఏమి చేసిందో అక్కడి ప్రజల ద్వారా నేరుగా విన్నాను” అని రాహుల్ గాంధీ చెప్పారు. SDMతో తన సంభాషణ సందర్భంగా, ఎవరైనా ఓటు హక్కును నిరాకరించడానికి అధికారిక ఇల్లు లేకపోవడాన్ని ప్రాతిపదికగా ఉపయోగించవచ్చా అని గాంధీ ప్రశ్నించారు. నిరాశ్రయులైన ఓటర్ల కోసం ఎన్నికల సంఘం స్వంతంగా ‘హౌస్ నంబర్ 0’ నిబంధనను ప్రస్తావిస్తూ, బేలా ఎస్టేట్ నివాసితుల పేర్లను ఎందుకు తొలగించారని ప్రశ్నించారు.

“ఇల్లు ఉన్నా లేకున్నా ఓటు హక్కుతో సంబంధం లేదు. CEC జ్ఞానేష్ కుమార్ స్వయంగా ‘హౌస్ నంబర్ 0’ నిరాశ్రయుల కోసం చెప్పారు. అయినప్పటికీ, 727 మంది పేర్లు కొట్టివేసారని” రాహుల్ గాంధీ చెప్పారు. ఈ ఓటు తొలగింపులను ‘ఓటు దొంగతనం’ అని ఆయన అభివర్ణించారు. దేశంలోని కొంతమంది పేద పౌరులకు అందుబాటులో ఉన్న ఏకైక రాజకీయ అధికారాన్ని అవి తీసివేయడమేనని అన్నారు. “ఓటు దొంగతనం పేదల హక్కులను కొల్లగొడుతోంది. ఇది గుర్తింపులను చెరిపివేస్తోంది, గొంతులను అణిచివేస్తోంది” అని రాహుల్ గాంధీ మరొక పోస్ట్‌లో తెలిపారు.

ఎన్నికల చీఫ్ జ్ఞానేష్ కుమార్‌ను కూడా లక్ష్యంగా చేసుకుని, “జ్ఞానేష్ కుమార్ వెళ్తాడు. అయితే ఈ విధంగా చేసిన వ్యవస్థకు కూడా సమాధానం చెప్పాలి.” బెలా ఎస్టేట్‌లో ఏమి జరిగింది ఢిల్లీ ఎస్ఐఆర్ రూపొందించిన ముసాయిదా ఎన్నికల జాబితా ఆగస్టు 31న ప్రచురించిన తర్వాత బేలా ఎస్టేట్ వివాదం బయటపడింది. ముందు 729 మంది ఓటర్లు ఉన్న డ్రాఫ్ట్ రోల్‌లో ఒక పేరు మాత్రమే కనిపించింది – 728 మినహాయించారు. అక్కడి స్థానికులు ఈ ప్రాంతంలో నివసిస్తున్నప్పటికీ వారి పేర్లు ఎందుకు తొలగించారు అర్థం కావడం లేదని అక్కడి ప్రజలు వాపోయారు, తాము దశాబ్దాలుగా ఈ ప్రాంతంలో నివసిస్తున్నామని, మునుపటి ఎన్నికలలో ఓటు వేసినట్లు చెప్పారు. కొందరు సర్ ఎన్యూమరేషన్ ఫారమ్‌లను పూరించి సమర్పించారని, అయితే డ్రాఫ్ట్ రోల్‌లో వారి పేర్లు కనిపించడం లేదని వారందరూ చెప్పారు.