ఆగ్రా: శ్రీకృష్ణునిపై చేసిన వివాదాస్పద వ్యాఖ్యల విషయంలో మత ప్రచారకుడు ధీరేంద్ర శాస్త్రిపై ఆగ్రా కోర్టులో క్రిమినల్ పరువు నష్టం ఫిర్యాదు దాఖలైందని ఒక న్యాయవాది తెలిపారు.
ఈమేరకు లాయర్‌ అజయ్ ప్రతాప్ సింగ్ ఆగ్రా సివిల్ కోర్టులో ఈ ఫిర్యాదును దాఖలు చేశారు. మధ్యప్రదేశ్‌లోని శివపురిలోని కరేరాలో జరిగిన ఓ సమావేశంలో ధీరేంద్ర శాస్త్రి శ్రీకృష్ణునిపై కించపరిచే వ్యాఖ్యలు చేశారని, ఆయన వంశీయుల మనోభావాలను, సామాజిక హోదాను దెబ్బతీశారని ఆరోపించారు.
ఆ సందర్భంగా ధీరేంద్ర శాస్త్రి, శ్రీరాముని, శ్రీకృష్ణుని శారీరక భంగిమలను పోల్చారు. శ్రీరాముడు నిటారుగా ఉంటాడని, కానీ శ్రీకృష్ణుడి భంగిమ మూడు చోట్ల వంకరగా (త్రిభంగ భంగిమ) ఉంటుందని, ఆయన వేణువు, బృందావనానికి సంబంధించిన అంశాలపై ఆయన చేసిన వ్యాఖ్యలు చర్చనీయాంశమయ్యాయి. శ్రీకృష్ణుడిని కించపరిచేలా, ఇద్దరు దేవుళ్ల మధ్య తేడా చూపించేలా ఈ వ్యాఖ్యలు ఉన్నాయంటూ మథుర, బృందావన సన్యాసులు, యాదవ సంఘాల నుంచి తీవ్ర నిరసనలు వ్యక్తమయ్యాయి.
శ్రీకృష్ణుడు ద్వాపర యుగంలో మానవ రూపంలో జన్మించాడని, ఆయన వంశీయులు ఇప్పటికీ భారతదేశంలో జీవిస్తున్నారని ఫిర్యాదుదారు వాదించారు. తన వాదనకు మద్దతుగా ఆయన జాదూన్లు, జడేజాలు, భాటీలు వంటి వర్గాలకు సంబంధించిన చారిత్రక ప్రస్తావనలను ఉదహరించారు.
లాయర్‌ అజయ్ ప్రతాప్ సింగ్ తన తల్లి తరఫు వంశం ద్వారా తాను శ్రీకృష్ణుని వారసుడినని కూడా పేర్కొన్నారు. ఈ వ్యాఖ్యలు కృష్ణుని వంశీయుల మతపరమైన మనోభావాలను దెబ్బతీశాయని, వారి సామాజిక ప్రతిష్టను దెబ్బతీశాయని ఆరోపించారు. కాగా, ఈ ఫిర్యాదును సివిల్ జడ్జి కంచన్ కుమార్ ముందు ప్రాథమిక విచారణకు స్వీకరించారు. కోర్టు ఈ కేసును నమోదు చేసి, తదుపరి విచారణను డిసెంబర్ 14వ తేదీకి వాయిదా వేసింది.
మతపరమైన కార్యక్రమాల నిర్వాహకులు, స్పాన్సర్లు వివాదాస్పద ప్రచారకులకు దూరంగా ఉండాలని సమాజ్‌వాదీ పార్టీ అధ్యక్షుడు అఖిలేష్ యాదవ్ పిలుపునిచ్చిన ఒక రోజు తర్వాత ఈ పరిణామం చోటుచేసుకుంది.
కాగా, అఖిలేష్ యాదవ్ వ్యాఖ్యలపై.. బీజేపీ రాష్ట్ర అధ్యక్షుడు పంకజ్ చౌదరి మాట్లాడుతూ… రామచరితమానస్ లోని ఒక శ్లోకాన్ని ఉటంకిస్తూ, తమ ప్రవర్తనే సందేహాస్పదంగా ఉన్నవారు ఇతరులకు బోధించకూడదని అన్నారు.
