Recent News

Copyright © 2024 Blaze themes. All Right Reserved.

గేమింగ్ మాయాజాలం.. గాడి తప్పుతున్న యువతరం!

Share It:

జయీముద్దీన్ అహ్మద్…✍️

వీడియో గేమ్స్‌లోని రంగుల ప్రపంచం యువతను వాస్తవ జీవితానికి దూరం చేస్తోందా? గంటల తరబడి గేమింగ్‌లో మునిగిపోతున్న యువత తమ భవిష్యత్తును, బాధ్యతలను విస్మరిస్తున్నారా? డిజిటల్ వినోదం జీవితాన్ని సులభతరం చేయాల్సింది పోయి, జీవితాన్నే తన గుప్పిట్లోకి తీసుకుంటోందా? ఇవి ఇప్పుడు సమాజం తీవ్రంగా ఆలోచించాల్సిన ప్రశ్నలు.

కల్పిత ప్రపంచంలో విజయాలు.. నిజ జీవితంలో సవాళ్లుగా మారుతున్నాయి. ఒక్కసారి ఊహించండి… చేతినిండా డబ్బు.. ఖరీదైన కార్లు.. విలాసవంతమైన భవంతులు.. అపారమైన అధికారం.. చట్టాలను ఉల్లంఘించినా భయం లేదు. నేరాలు చేసినా శిక్షల బెంగ లేదు. ఇష్టమొచ్చినట్లు జీవించవచ్చు. ఇదంతా నిజ జీవితంలో సాధ్యమా? కాదు. ఇదొక వీడియో గేమ్ ప్రపంచం.

ప్రపంచవ్యాప్తంగా కోట్లాది మంది యువతను ఆకర్షిస్తున్న ‘గ్రాండ్ తెఫ్ట్ ఆటో’ (జీటీఏ) గేమ్ ఇందుకు నిదర్శనం. 2013లో విడుదలైన జీటీఏ ఐదో భాగం తర్వాత దాదాపు 13 ఏళ్లపాటు గేమింగ్ ప్రియులు ఆరో భాగం కోసం ఎదురుచూశారు. 2026 నవంబర్ 19న జీటీఏ-6 విడుదల కావడంతో గేమింగ్ ప్రపంచంలో సంచలనం నెలకొంది. రాయిటర్స్ కథనం ప్రకారం ఈ గేమ్‌కు సంబంధించి భారీ ముందస్తు అమ్మకాలు, బిలియన్ల డాలర్ల ఆదాయ అంచనాలు వెలువడ్డాయి. అమెరికాలో గేమ్ విడుదల సందర్భంగా ఉద్యోగులు సెలవులు తీసుకునే అవకాశాలపైనా చర్చ జరిగింది.

భారత రాజకీయాల్లోనూ ఈ గేమ్ ప్రస్తావన వచ్చింది. ప్రధాని నరేంద్ర మోదీ ‘ఇండియా ఈజ్ ప్లేయింగ్ ఏ హోల్ న్యూ గేమ్’ అంటూ జీటీఏ శైలిలో రూపొందించిన పోస్టర్ల ద్వారా దేశాభివృద్ధిని యువతకు పరిచయం చేసే ప్రయత్నం చేశారు. ఒక వీడియో గేమ్ సామాజిక, ఆర్థిక, రాజకీయ చర్చల్లోనూ చోటు సంపాదించిందంటే దాని ప్రభావం ఎంత విస్తృతమైందో అర్థం చేసుకోవచ్చు.

వినోదం వ్యసనంగా మారితే?..వీడియో గేమ్స్ ఆడటం తప్పు కాదు. విశ్రాంతికి, మానసిక ఉల్లాసానికి అవి ఉపయోగపడవచ్చు. కానీ వినోదం జీవితాన్ని ఆక్రమించినప్పుడే అసలు సమస్య మొదలవుతుంది. జీటీఏ వంటి గేమ్స్‌లో ఆటగాడు తనకు నచ్చిన పాత్రను ఎంచుకోవచ్చు. డబ్బు, అధికారం, విలాసాలు, పోరాటాలు, నేరాలు.. అన్నీ కల్పిత ప్రపంచంలో అనుభవించవచ్చు. నిజ జీవితంలో సాధించలేని స్వేచ్ఛను అక్కడ పొందుతున్నామనే భావన కొందరిని గంటల తరబడి గేమింగ్‌కు కట్టిపడేస్తోంది.

గేమ్‌లో ఓడిపోతే మళ్లీ మొదలుపెట్టవచ్చు. కానీ నిజ జీవితంలో ప్రతి నిర్ణయానికీ పరిణామాలుంటాయి. చదువు, కుటుంబం, ఉద్యోగం, సామాజిక సంబంధాలు.. వీటిని నిర్లక్ష్యం చేస్తే కోల్పోయిన అవకాశాలను తిరిగి పొందడం అంత సులభం కాదు.

తెరపై హింస.. సమాజంపై ప్రభావం?..జీటీఏ వంటి గేమ్స్‌లో నేరాలు, ఆయుధాలు, దాడులు, హింసను వినోదంగా చూపిస్తారు. ‘కాల్ ఆఫ్ డ్యూటీ’ వంటి గేమ్స్‌లో యుద్ధాలు, సైనిక దాడులు, ప్రత్యేక దళాల కార్యకలాపాలను మిషన్ల రూపంలో అందిస్తారు. యుద్ధం, విధ్వంసం వంటి తీవ్రమైన అంశాలు వినోదంగా మారినప్పుడు వాటిపట్ల యువతలో సున్నితత్వం తగ్గే ప్రమాదం ఉందా? హింసను సాధారణ విషయంగా భావించే ధోరణి పెరుగుతుందా? అన్నది చర్చించాల్సిన అంశం.

అయితే వీడియో గేమ్స్ ఆడటం వల్లనే ఒక వ్యక్తి హింసాత్మకంగా మారతాడని నిర్ధారించడం సరైంది కాదు. కుటుంబ వాతావరణం, మానసిక ఆరోగ్యం, సామాజిక పరిస్థితులు వంటి అనేక అంశాలు వ్యక్తి ప్రవర్తనను ప్రభావితం చేస్తాయి. అందుకే గేమింగ్ ప్రభావాలపై శాస్త్రీయ పరిశోధన, సామాజిక అవగాహన అవసరం.

ఆరోగ్యానికి ముప్పుగా గేమింగ్... గంటల తరబడి గేమింగ్‌కు అలవాటుపడటం వల్ల నిద్రలేమి, శారీరక శ్రమ తగ్గడం, కళ్లపై ఒత్తిడి, కండరాల నొప్పులు, ఆహారపు అలవాట్లలో మార్పులు వంటి సమస్యలు ఎదురవుతాయి. కుటుంబ సభ్యులతో గడిపే సమయం కూడా తగ్గుతుంది.ప్రపంచ ఆరోగ్య సంస్థ గేమింగ్ డిజార్డర్‌ను గుర్తించింది. గేమింగ్‌పై నియంత్రణ కోల్పోవడం, ఇతర జీవిత కార్యకలాపాల కంటే దానికే ప్రాధాన్యత ఇవ్వడం, ప్రతికూల పరిణామాలు ఎదురైనా అలవాటును కొనసాగించడం దీని ముఖ్య లక్షణాలు. అయితే ఎక్కువ సమయం గేమ్ ఆడినంత మాత్రాన ప్రతి ఒక్కరినీ వ్యసనపరులుగా పరిగణించలేం. జీవితంపై దాని ప్రభావాన్ని పరిశీలించాలి.

కాలం విలువ తెలుసుకోవాలి...ఈ అంశాన్ని ఇస్లామీయ దృక్పథంలో పరిశీలిస్తే సమయం, బాధ్యత, నైతికతల ప్రాధాన్యత స్పష్టమవుతుంది. ఇస్లాం వినోదాన్ని నిషేధించదు. అయితే జీవితంలో సమతుల్యత పాటించాలని బోధిస్తుంది. పవిత్ర ఖుర్‌ఆన్‌లోని సూరతుల్ అస్ర్‌లో అల్లాహ్ ఇలా సెలవిస్తున్నాడు: ‘కాలం సాక్షిగా! నిశ్చయంగా మానవుడు నష్టంలో ఉన్నాడు.

‘సంపదను తిరిగి సంపాదించుకోవచ్చు. కోల్పోయిన వస్తువులను తిరిగి పొందవచ్చు. కానీ గడిచిపోయిన కాలాన్ని మాత్రం వెనక్కి తీసుకురాలేం. ప్రవక్త ముహమ్మద్‌ (స) ఒక హదీసులో ఆరోగ్యం, తీరిక సమయం అనే రెండు అనుగ్రహాల విషయంలో చాలామంది నష్టపోతున్నారని హెచ్చరించారు.

నేటి యువతకు ఈ సందేశం ఎంతో అవసరం. చదువుకోవాల్సిన వయసులో, భవిష్యత్తుకు బాటలు వేసుకోవాల్సిన సమయంలో అమూల్యమైన సమయాన్ని వ్యర్థం చేయడం ఆత్మవిమర్శ చేసుకోవాల్సిన విషయం. ప్రతి కోరికను తీర్చుకోవడమే స్వేచ్ఛ కాదు. కోరికలను అదుపులో ఉంచుకుని సరైన మార్గంలో నడవడమే నిజమైన విజ్ఞత.

బాధ్యత అందరిదీ…యువతను నిందించడం, గేమ్స్‌ను నిషేధించాలని కోరడం మాత్రమే పరిష్కారం కాదు. తల్లిదండ్రులు పిల్లల డిజిటల్ అలవాట్లను గమనించాలి. వయసుకు తగిన గేమ్స్ ఎంపికలో మార్గనిర్దేశం చేయాలి. వారితో సమయం గడుపుతూ క్రీడలు, పుస్తక పఠనం, సృజనాత్మక కార్యక్రమాలవైపు ప్రోత్సహించాలి.విద్యాసంస్థలు డిజిటల్ అక్షరాస్యత, సైబర్ భద్రత, గేమింగ్ వ్యసనంపై అవగాహన కల్పించాలి. మానసిక ఒత్తిడి, ఒంటరితనం వంటి సమస్యలను గుర్తించి యువతకు అవసరమైన సహాయం అందించాలి.

యువత కూడా తమను తాము ప్రశ్నించుకోవాలి. నేను గేమ్‌ను ఆడుతున్నానా? లేక గేమ్ నన్ను ఆడిస్తోందా? నా చదువు, నైపుణ్యాలు, ఉపాధి, కుటుంబం, దైవారాధనకు తగిన ప్రాధాన్యత ఇస్తున్నానా?సాంకేతికత మనిషికి సహాయకారిగా ఉండాలి తప్ప, మనిషే దానికి బానిస కాకూడదు. జీటీఏ ప్రపంచంలో ఖరీదైన కార్లు నడపవచ్చు. విలాసవంతమైన భవంతులు నిర్మించుకోవచ్చు. కానీ నిజ జీవితంలో విజయాన్ని మనమే నిర్మించుకోవాలి. ప్రతిభను పెంపొందించుకోవడం, జ్ఞానాన్ని సంపాదించడం, కుటుంబానికి అండగా నిలవడం, సమాజానికి ఉపయోగపడటమే అసలైన విజయం.

యువత గేమ్స్‌లో లెవల్స్ పెంచుకోవడం కంటే జీవితంలో లక్ష్యాలను పెంచుకోవాలి. కల్పిత ప్రపంచంలో హీరోలుగా నిలవడం కంటే నిజ జీవితంలో బాధ్యతగల పౌరులుగా ఎదగాలి. ఎందుకంటే గేమ్‌లో ఓడిపోతే మరో అవకాశం ఉంటుంది. కానీ జీవితంలో గడిచిపోయిన సమయం తిరిగి రాదు. గేమ్ ముగిసినప్పుడు తెర ఆగిపోతుంది.. జీవితం మాత్రం కొనసాగుతుంది. ఆ జీవితంలో మనం సాధించేదే అసలైన విజయం!

Tags :

Grid News

Latest Post

వర్తమానం ఒక ప్రముఖ తెలుగు వెబ్ పత్రిక. డిజిటల్ రంగంలో నిజాయితీ, పారదర్శకత, విశ్వసనీయతతో కూడిన వార్తలను ప్రజలకు అందించడమే లక్ష్యంగా ఏర్పాటైంది.

Latest News

Most Popular

Copyright © 2024 Vartamanam. All Right Reserved.