లక్నో: స్వచ్ఛందంగా ఇస్లాం మతంలోకి మారినట్లు పేర్కొన్న ఇద్దరు హిందూ మహిళలను విడుదల చేయాలని అలహాబాద్ హైకోర్టు గత వారం ఆదేశించింది. నచ్చిన మతాన్ని ఎంచుకునే స్వేచ్ఛ వయోజనులకు రాజ్యాంగం ఇచ్చిన హక్కు అని గుర్తు చేస్తూనే.. వారి స్వేచ్ఛను కాపాడడంంలో రాష్ట్ర ప్రభుత్వం, పోలీసులు తీవ్రంగా విఫలం అయ్యారని పేర్కొంది. ఈ సందర్భంగానే బాధితులు అయిన ఇద్దరు అమ్మాయిలకు.. వారి తండ్రితో పాటు యూపీ సర్కారు సంయుక్తంగా రూ.25 లక్షల పరిహారాన్ని చెల్లించాలని స్పష్టం చేసింది.

ఆగస్టు 6న ఒక హెబియస్ కార్పస్ పిటిషన్‌పై విచారణ జరిపిన జస్టిస్ సందీప్ జైన్… 35, 20 ఏళ్ల వయస్సు గల ఆ అక్కాచెల్లెళ్లు మేజర్లుగా తమ మతం, నివాసం, వ్యక్తిగత వ్యవహారాలను నిర్ణయించుకునే హక్కును కలిగి ఉన్నారని పేర్కొన్నారు.

‘హక్కుల ఉల్లంఘన’
“ఈ కేసు రాజ్యాంగ హక్కుల అత్యంత తీవ్రమైన ఉల్లంఘన అని వర్ణిస్తూ, ‘శ్రీమతి దియా భాటియా అలియాస్ జోయా దియా భాటియా, శ్రీమతి అన్షు భాటియా అలియాస్ అమీనా అన్షు భాటియా, ప్రతివాది నెం. 4 (బాలికల తండ్రి) గానీ, మరే ఇతర వ్యక్తి గానీ, అధికారుల గానీ ఎటువంటి జోక్యం లేకుండా, తమకు నచ్చిన ఏ ప్రదేశంలోనైనా, వ్యక్తితోనైనా నివసించడానికి స్వేచ్ఛగా ఉన్నారని ప్రకటిస్తున్నామని” కోర్టు పేర్కొంది.

అసలేం జరిగిందంటే…?
తన కుమార్తెలైన దియా భాటియా అలియాస్ జోయా దియా భాటియా (20), అన్షు భాటియా అలియాస్ అమీనా అన్షు భాటియా (35)లను ప్రలోభాలకు గురిచేసి.. బెదిరించి మతం మార్చారంటూ వారి తండ్రి ఆరోపణలు చేశారు. ఈ ఆరోపణల నెపంతోనే ఆయన వారిని ఇంట్లోనే నిర్బంధించారు. అయితే తమను అక్రమ నిర్బంధం నుంచి విడిపించాలని కోరుతూ బాధిత యువతులు ఇద్దరూ అలహాబాద్ హైకోర్టులో ‘హెబియస్ కార్పస్’ పిటిషన్‌ను దాఖలు చేశారు. విచారణ సందర్భంగా న్యాయమూర్తి జస్టిస్ సందీప్ జైన్ నేరుగా బాధిత యువతులతో మాట్లాడారు. వారు ఎవరి ఒత్తిడికీ లొంగలేదని, స్వచ్ఛందంగానే మతం మారాలని నిర్ణయించుకున్నారని నిర్ధారించుకున్నారు. దీంతో తండ్రి చేసిన బెదిరింపులు, ప్రలోభాల ఆరోపణలను న్యాయస్థానం పూర్తిగా కొట్టివేసింది.

ఆ మహిళల వ్యక్తిగత స్వేచ్ఛ, కదలిక, నివాసం, వృత్తి లేదా మతపరమైన ఎంపికలలో తండ్రి జోక్యం చేసుకోకూడదని కూడా హైకోర్టు ఆదేశించింది. మహిళలు ప్రశాంతంగా జీవించేలా చూడాలని, అవసరమైతే వారికి రక్షణ కల్పించాలని రాష్ట్ర అధికారులను ఆదేశించారు.

ఏడు రోజుల్లోగా వారి పాస్‌పోర్ట్‌లు, విద్యా ధృవపత్రాలు, గుర్తింపు పత్రాలు, బ్యాంకు పాస్‌బుక్‌లు, చెక్ బుక్‌లు, మత మార్పిడికి సంబంధించిన పత్రాలు, ఇతర అసలు పత్రాలు, వస్తువులను అప్పగించాలని తండ్రిని ఆదేశించారు.

స్థానిక పోలీసుల సహాయం
తమ పిటిషన్‌లో, మహిళలు తమ న్యాయవాది ద్వారా, తాము ఈ నిర్ణయాలు తీసుకోకుండా ఆపడానికి తమ తండ్రి 2025 మే నెలలో ఆగ్రాలో పోలీసులకు ఫిర్యాదు చేశారని ఆరోపించారు. అంతేకాకుండా, వారు తమ తండ్రి కోరికలకు వ్యతిరేకంగా ప్రవర్తించినందున, స్థానిక పోలీసుల సహాయంతో వారిని చట్టవిరుద్ధంగా నిర్బంధిస్తున్నారని కూడా ఆరోపించారు.

బలవంతం, మోసం, ఒత్తిడి లేదా వంచన ద్వారా మత మార్పిడులు జరిగాయని ఎటువంటి ఆధారాలు లేనందున, ఈ కేసుకు ఉత్తర ప్రదేశ్ చట్టవిరుద్ధ మత మార్పిడుల నిషేధ చట్టం, 2021 వర్తించదని ఆ సోదరీమణుల న్యాయవాది వాదించారు. జూలై 31న జరిగిన చివరి విచారణలో, ఆగస్టు 6న పిటిషనర్లను తమ ముందు హాజరుపరచాలని కోర్టు రాష్ట్ర ప్రభుత్వాన్ని ఆదేశించింది.

ఆరోపించిన మత మార్పిడులు ఒక పెద్ద వ్యవస్థీకృత కుట్రకు సంబంధించినవని, చట్టవిరుద్ధ మత మార్పిడుల ఆరోపణలపై దర్యాప్తు జరుగుతోందని వాదిస్తూ, రాష్ట్ర ప్రభుత్వం హెబియస్ కార్పస్ పిటిషన్‌ను వ్యతిరేకించింది. భారతీయ న్యాయ సంహిత (BNS), ఉత్తర ప్రదేశ్ చట్టవిరుద్ధ మత మార్పిడుల నిషేధ చట్టం, 2021లోని నిబంధనలను ప్రయోగించిన ఒక క్రిమినల్ కేసును కూడా రాష్ట్ర ప్రభుత్వం ప్రస్తావించింది.

అయితే, ఆరోపించిన మత మార్పిడి చట్టబద్ధత, మహిళల నిర్బంధపు చట్టబద్ధత అనేవి రెండు వేర్వేరు అంశాలని హైకోర్టు పేర్కొంది. 2021 మతమార్పిడి చట్టం పాటించడంపై ప్రశ్నలు ఉన్నప్పటికీ, కేవలం ఆ ఒక్క కారణంతోనే ఇద్దరు వయోజన మహిళలను వారి తండ్రి నిర్బంధంలో కొనసాగించడానికి అధికారం లభించదని అది పేర్కొంది.

తన పరిశీలనలు అక్రమ నిర్బంధం అనే విషయానికే పరిమితమని, అవి విచారణలో ఉన్న క్రిమినల్ కేసుల యోగ్యతను ప్రభావితం చేయవని, లేదా ఆరోపిత మతమార్పిడుల చట్టబద్ధతను గానీ, చెల్లుబాటును గానీ నిర్ధారించవని కూడా అది స్పష్టం చేసింది.

ఎలాంటి చట్టబద్ధమైన అనుమతి లేకుండా…ప్రభుత్వంతో కుమ్మక్కై… వారి తండ్రి వారిని నిర్బంధించడం “పూర్తిగా చట్టవిరుద్ధం” అని, దానికి చట్టబద్ధమైన అనుమతి లేదని కోర్టు తేల్చింది. వారి స్వేచ్ఛను పరిరక్షించడంలో రాష్ట్రం తన రాజ్యాంగ విధిని నిర్వర్తించడంలో కూడా విఫలమైందని అది పేర్కొంది.

కేవలం తమ పిల్లల విశ్వాసం, నమ్మకాలు లేదా వ్యక్తిగత ఎంపికలను వ్యతిరేకించినందుకే, మేజర్ అయిన తమ పిల్లలను నిర్బంధించడానికి రాజ్యాంగం తల్లిదండ్రులకు ఎటువంటి అధికారాన్ని ఇవ్వదు. రాజ్యాంగ హక్కులను తల్లిదండ్రుల అధికారం, సామాజిక నైతికత లేదా మెజారిటీ ప్రజల భావజాలం కప్పివేయలేవు. వయోజనుడైన వ్యక్తి స్వేచ్ఛ ఉల్లంఘించరానిది, ఆ స్వేచ్ఛను బలప్రయోగం లేదా ఒత్తిడితో అణచివేసే ఏ ప్రయత్నమైనా ఈ న్యాయస్థానం రాజ్యాంగ పరిశీలనకు గురవుతుంది. ప్రాథమిక హక్కుల ఉల్లంఘనకు గాను… పరిహారం అందించడంతో సహా తగిన ప్రజా చట్టపరమైన పరిణామాలను ఎదుర్కోవలసి వస్తుంది,” అని న్యాయస్థానం తెలిపింది.