అంకారా: ఉద్రిక్తతలు విస్తృత సంఘర్షణగా మారకుండా నిరోధించడానికి టర్కీ దౌత్య ప్రయత్నాలను ముమ్మరం చేసింది. ఈ తరుణంలో, అమెరికా, ఇరాన్ చర్చల ద్వారా ఒక పరిష్కారానికి రాలేకపోవడానికి ఎటువంటి కారణం లేదని టర్కీ భావిస్తోందని ఆ దేశ విదేశాంగ మంత్రి హకాన్ ఫిదాన్ అన్నారు.

ఈమేరకు నిన్న బెర్లిన్‌లో మాట్లాడుతూ…ఘర్షణల వల్ల కలిగే నష్టాలను వాషింగ్టన్, టెహ్రాన్ రెండూ అర్థం చేసుకున్నాయని టర్కీ విశ్వసిస్తోందని, ముందుకు సాగడానికి చర్చలే ఏకైక ఆచరణీయ మార్గమని ఫిదాన్ నొక్కి చెప్పారు.

సంబంధిత పక్షాలన్నింటితో దౌత్య సంబంధాలను కొనసాగిస్తూనే, పాకిస్తాన్ మధ్యవర్తిత్వ ప్రయత్నాలకు మద్దతు ఇవ్వడం, ప్రస్తుత కాల్పుల విరమణను పరిరక్షించడంలో సహాయపడటంపై అంకారా తక్షణ దృష్టి సారించిందని ఫిదాన్ తెలిపారు.

ఉక్రెయిన్, గాజా, ఆఫ్రికాలోని కొన్ని ప్రాంతాలలో నెలకొన్న సంఘర్షణలకు కూడా టర్కీ ఇదే విధానాన్ని అనుసరిస్తోందని, శత్రుత్వాలను అంతం చేయడానికి దౌత్యం, సమన్వయంతో కూడిన అంతర్జాతీయ ఒత్తిడి అవసరమని టర్కీ విదేశాంగ మంత్రి వాదించారు.

“చర్చలు, సంప్రదింపులు మాత్రమే సుస్థిరమైన పరిష్కారాలు” అని ఫిదాన్ అన్నారు. హర్ముజ్ జలసంధితో సహా ఈ ప్రాంతంలో దౌత్యం ద్వారా స్థిరత్వాన్ని సాధించవచ్చనే టర్కీ వైఖరిని ఆయన పునరుద్ఘాటించారు.

టర్కీ ప్రభావాన్ని జర్మనీ సమర్థిస్తుంది
ప్రాంతీయ సంక్షోభ దౌత్యంలో టర్కీ పాత్రను జర్మనీ గట్టిగా సమర్థించింది. అనేక సంఘర్షణ ప్రాంతాలలో అంకారాకు గణనీయమైన రాజకీయ, వ్యూహాత్మక ప్రభావం ఉందని అభివర్ణించింది.

“ఈ సమస్యాత్మక ప్రాంతాలపై గణనీయమైన ప్రభావాన్ని చూపే సామర్థ్యం టర్కీకి ఉంది. కేవలం దాని భౌగోళిక సామీప్యత వలనే కాకుండా, దానికున్న అపారమైన రాజకీయ, ఆర్థిక ప్రాముఖ్యత కారణంగా కూడా ఇది సాధ్యమవుతుందని” జర్మన్ మంత్రి విలేకరులతో అన్నారు.

టర్కీ, యూరోపియన్ యూనియన్ మధ్య లోతైన వ్యూహాత్మక సంబంధాలకు కూడా జర్మనీ మద్దతు తెలిపింది. ఐరోపా అభివృద్ధి చెందుతున్న రక్షణ, పారిశ్రామిక వ్యవస్థలలో అంకారా మరింత కీలక పాత్ర పోషించాలని బెర్లిన్ కోరుకుంటోందని ఆయన అన్నారు.

“టర్కీ యూరోపియన్ యూనియన్‌లో చేరాలని కోరుకుంటే, దానికి జర్మనీలో ఒక స్నేహపూర్వక, నమ్మకమైన భాగస్వామి లభిస్తుందని” జర్మన్ మంత్రి వాడెఫుల్ అన్నారు. అయితే, ఈయూ సభ్యత్వం అనేది ఆ కూటమి ప్రవేశ ప్రమాణాలను నెరవేర్చడంపైనే ఆధారపడి ఉంటుందని ఆయన పేర్కొన్నారు.

భద్రత, దౌత్యం, వాణిజ్యం వంటి రంగాలలో ఈ రెండు నాటో మిత్రదేశాల మధ్య సహకారాన్ని విస్తరించడమే లక్ష్యంగా పెట్టుకున్న జర్మనీ-టర్కీ వ్యూహాత్మక సంభాషణ యంత్రాంగం మూడవ సమావేశానికి సహ-అధ్యక్షత వహించడానికి ఈ ఇద్దరు మంత్రులు బెర్లిన్‌లో సమావేశమయ్యారు.

టర్కీ ఈయూ ప్రవేశ ప్రయత్నాన్ని రాజకీయాల ఆధారంగా కాకుండా యోగ్యత ఆధారంగా అంచనా వేయాలని ఫిదాన్ పిలుపునిచ్చారు. అలాగే, ద్వైపాక్షిక వాణిజ్యాన్ని 60 బిలియన్ డాలర్లకు పెంచే దిశగా అంకారా, బెర్లిన్ కృషి చేస్తున్నాయని టర్కీ విదేశాంగ మంత్రి తెలిపారు.