లక్నో: బీజేపీ పాలనలో యూపీలోని 72 జిల్లాల్లో అంబేద్కర్ విగ్రహాలు 151 వరకు ధ్వంసమయ్యాయని, అయితే ఇప్పటివరకు కేవలం 14 మందిని మాత్రమే అరెస్టు చేశారని సమాజ్వాదీ పార్టీ అధినేత అఖిలేష్ యాదవ్ ఆరోపించారు.
రాజ్యాంగాన్ని మార్చాలని బీజేపీ భావించినప్పటికీ అందులో విఫలమైనందుకే ఈ విధ్వంసకాండకు ఉద్దేశపూర్వకంగా పాల్పడ్డారని ఆయన ఆరోపించారు. కాగా, దీనిపై బీజేపీ నుంచి తక్షణ స్పందన రాలేదు.
“రాజ్యాంగాన్ని మార్చాలని బీజేపీ కోరుకుంది… కానీ అందులో విఫలమయ్యారు, అందుకే ఈ పని ఉద్దేశపూర్వకంగా చేశారు. బీజేపీ, అదే భావజాలం ఉన్నవారు దాడి చేసినప్పుడల్లా, వారు మొదటగా లక్ష్యంగా చేసుకునేది చేతిలో ఉండే రాజ్యాంగ ప్రతిని,” అని ఆయన అన్నారు.
కాగా, అంబేద్కర్ విగ్రహాల ధ్వంసానికి సంబంధించి మొత్తం 151 కేసులను తమ పార్టీ గుర్తించిందని ఆయన చెప్పారు. “మొత్తంగా మేము 151 కేసులను నమోదు చేయగలిగాము. సగటున చూస్తే, ఈ ప్రభుత్వ హయాంలో ఏటా 15కి పైగా విగ్రహాలు ధ్వంసమయ్యాయి. లెక్కలోకి రాని కేసులు కూడా ఉండవచ్చు,” అని ఆయన అన్నారు.
ప్రభుత్వ గణాంకాలను ఉటంకిస్తూ, కేవలం 14 కేసుల్లోనే అరెస్టులు జరిగాయని అఖిలేష్ యాదవ్ తెలిపారు. 45 సందర్భాల్లో గుర్తు తెలియని వ్యక్తులపై కేసులు నమోదయ్యాయి. ఎనిమిది సందర్భాల్లో నిర్దిష్ట వ్యక్తుల పేర్లతో ఎఫ్ఐఆర్ దాఖలైంది. 84 కేసుల్లో ఎటువంటి చర్యలూ తీసుకోలేదని ఆయన అన్నారు.
బీజేపీ ప్రభుత్వం అంబేద్కర్ పట్ల గానీ, ఆయన విగ్రహాల పట్ల గానీ, ఆయన అనుచరుల పట్ల గానీ గౌరవం చూపడం లేదని అఖిలేష్ అన్నారు. అనంతరం, సమాజ్వాదీ పార్టీ సోషల్ మీడియా ప్లాట్ఫామ్ ‘X’లో జిల్లా వారీగా వివరాలను పోస్ట్ చేసింది.
మీడియా నివేదికలను ఉటంకిస్తూ ఆ పోస్ట్లో పేర్కొన్న వివరాల ప్రకారం.. బల్లియాలో 9, అజమ్గఢ్లో 6, మథుర, ముజఫర్నగర్ మరియు సహారన్పూర్లలో చెరో 5, అలాగే ఘాజీపూర్, గౌతమ్ బుద్ధ నగర్, ప్రయాగ్రాజ్, లక్నో మరియు వారణాసిలలో చెరో 4 అంబేద్కర్ విగ్రహాలపై దాడులు జరిగాయి. ఈ జాబితాలో 21వ స్థానంలో ఉన్న గోరఖ్పూర్లో రెండు విగ్రహాలు ధ్వంసమయ్యాయి.
కాగా “అరాచక ధోరణి కలిగిన భూస్వామ్య శక్తుల”పై ఎటువంటి పోలీసు చర్య తీసుకోలేదని ఆ పార్టీ పేర్కొంది.
యోగి ఆదిత్యనాథ్ ప్రభుత్వ మొదటి దఫాలో 46 అంబేద్కర్ విగ్రహాలు ధ్వంసం కాగా, రెండో సారి అధికారంలోకి వచ్చాక 105 విగ్రహాలు ధ్వంసమయ్యాయని ఆ పార్టీ తెలిపింది.
సంవత్సరాల వారీగా చూస్తే, 2022లో నాలుగు, 2023లో 12, 2024లో 13, 2025లో 29, 2026లో 47 విగ్రహాలు ధ్వంసమయ్యాయని ఆ వివరాలు పేర్కొన్నాయి.
ఈమేరకు పార్టీ కార్యాలయంలో అఖిలేష్ విలేకర్లతో మాట్లాడుతూ… ముఖ్యమంత్రి యోగి ఆదిత్యనాథ్పై వ్యంగ్యాస్త్రాలు సంధించారు. “సఫాయి రించి నిరంతరం మాట్లాడేవారు రికార్డులను పరిశీలించాలి; ముఖ్యమంత్రి అత్యధిక సార్లు సందర్శించిన ప్రాంతం గోరఖ్పూరే అని మీకు తెలుస్తుంది. ఆయనలా మరే ముఖ్యమంత్రీ తమ సొంత జిల్లాను అంత తరచుగా సందర్శించలేదని ఆయన అన్నారు.
అంతేకాకుండా, అయోధ్యలో ప్రపంచ రికార్డు నెలకొల్పేందుకు ప్రయత్నం జరిగిందని, అయితే ఆ ఉద్దేశంతో కేటాయించిన నిధులు దుర్వినియోగమయ్యాయని అఖిలేష్ యాదవ్ ఆరోపించారు. “అయోధ్య, వారణాసిని కలిపే రహదారి నిర్మాణంలో భారీ స్థాయిలో అవినీతి జరిగిందని అన్నారు.”
బీజేపీకి చెందిన సనాతన ధర్మ సిద్ధాంతం గురించి ప్రస్తావిస్తూ…”శ్రీరాముడికి సమర్పించే కానుకలు దొంగిలించకుండా చూడటమే సనాతన మార్గమని ఆయన అన్నారు. “ఒక హత్యకు కుట్ర పన్నడం సనాతన మార్గం కాజాలదు. అబద్ధపు ఆరోపణలు సృష్టించడం సనాతన మార్గం కాజాలదని అఖిలేష్ అన్నారు.”
“బీజేపీ ప్రజల మనసును గాయపరిచింది, బాధపెట్టింది. ఉత్తరప్రదేశ్లో వాతావరణాన్ని కలుషితం చేయడానికి వారు చురుకుగా పనిచేశారని ఆయన ఆరోపించారు. “ఇది న్యాయం అందించడంలో విఫలమవుతున్న ప్రభుత్వం, దీని సొంత మంత్రులే ధర్నాలు చేయవలసి వస్తోంది. ఈ ప్రభుత్వ పరిస్థితి ఇదే,” అని ఆయన అన్నారు.
“సమాజ్వాదీ పార్టీ ప్రభుత్వ హయాంలో అమలు చేసిన ఏ పథకమైనా అత్యుత్తమ నాణ్యతతో ఉంటుందని ఉత్తరప్రదేశ్ ప్రజలకు తెలుసు. లక్నోలోని ‘లోక్ భవన్’ సమాజ్వాదీల కృషికి ఒక నిదర్శనం. దీని నిర్మాణంలో ఎంతటి నాణ్యమైన సామగ్రిని ఉపయోగించారంటే, నాటి ఛాయాచిత్రాలలో అవి ఎలా కనిపించేవో, నేటికీ అలాగే కనిపిస్తున్నాయి,” అని ఆయన అన్నారు.
