న్యూఢిల్లీ: ప్రధానమంత్రి నరేంద్ర మోదీ, కేంద్ర హోం మంత్రి అమిత్ షా, ప్రధాన ఎన్నికల కమిషనర్ (సీఈసీ) జ్ఞానేష్ కుమార్లు ‘దేశద్రోహులు’ అని కాంగ్రెస్ అగ్రనేత రాహుల్ గాంధీ ఘాటుగా విమర్శించారు. భారత ఎన్నికల వ్యవస్థను, ప్రజల ఓటు హక్కును వీరు ముగ్గురూ కలిసి నాశనం చేశారని రాహుల్ గాంధీ ఆరోపించారు. అంతేకాదు సీఈసీ తక్షణమే రాజీనామా చేయాలని ఆయన డిమాండ్ చేశారు.
అసెంబ్లీ, లోక్సభ ఎన్నికలలో రిగ్గింగ్ జరుగుతోందని తాను “వంద శాతం” నమ్ముతున్నానని లోక్సభ ప్రతిపక్ష నేత పేర్కొన్నారు. ఓటును నాశనం చేయడం చివరికి రాజ్యాంగం, చట్టాలు, ప్రజాస్వామ్య సంస్థలను బలహీనపరుస్తుందని ఆయన పేర్కొన్నారు.
ఎన్నికల కమిషనర్లు సుఖ్బీర్ సింగ్ సంధు, వివేక్ జోషిలు తమకు తెలియకుండా తీసుకున్న అంశాలతో సహా, ఓటర్ల జాబితాలు, ప్రత్యేక విస్తృత సవరణ (SIR)కు సంబంధించిన నిర్ణయాలు, ఉత్తర్వులపై 10 నెలల వ్యవధిలో కనీసం 14 సార్లు అధికారికంగా అభ్యంతరం వ్యక్తం చేశారని ‘ది ఇండియన్ ఎక్స్ప్రెస్’ నివేదించిన ఒక రోజు తర్వాత రాహుల్గాంధీ ఈ ఆరోపణలు చేశారు.
ఓటర్ల నమోదుకు ఉపయోగించే ఫారం 6లో మార్పులు, ఓటర్ల జాబితా డేటాబేస్కు , పశ్చిమ బెంగాల్లో ఎస్ఐఆర్ (SIR) ప్రక్రియ నుండి తలెత్తిన అప్పీళ్ల నిర్వహణపై ఇద్దరు కమిషనర్లు ఆందోళన వ్యక్తం చేసినట్లు సమాచారం. ఓటర్ల జాబితా డేటాబేస్ను క్రమంగా కేంద్రీకరించడాన్ని కూడా వారు వ్యతిరేకించారు. చట్టబద్ధమైన ఎన్నికల అధికారులు ఉపయోగించే వ్యవస్థలకు ప్రాప్యతను పరిమితం చేసే అధికారుల అధికారాన్ని ప్రశ్నించారు.
ఢిల్లీలోని ఇందిరా భవన్లో జరిగిన విలేకరుల సమావేశంలో రాహుల్గాంధీ మాట్లాడుతూ, ఎన్నికల కమిషన్ ఓటును రక్షించాల్సి ఉందని, జ్ఞానేష్ కుమార్ దేశ ప్రయోజనాలకు వ్యతిరేకంగా వ్యవహరించారని ఆరోపించారు.
“ఇది దేశ రాజ్యాంగంపై, చట్టపరమైన వ్యవస్థపై దాడి. మీరు ఓటుకు రక్షణ కల్పించాల్సింది. దీనిని నిశ్చయంగా నిరూపించడానికి మా వద్ద తగినంత సమాచారం ఉంది,” అని గాంధీ అన్నారు. “దీనికి పరిణామాలు ఉంటాయి. ప్రజాస్వామ్యం నాశనం అవుతుంటే మేము మౌనంగా కూర్చోము. బాధ్యులను శిక్షిస్తామని రాహుల్ అన్నారు.”
సీఈసీ జ్ఞానేష్ కుమార్ అప్రూవర్గా మారాలని, ఇది జాతీయవాద చర్య అవుతుందని గాంధీ సూచించారు. “జ్ఞానేష్ కుమార్ అప్రూవర్గా మారాలని నా సూచన. అలా చేయడం ఆయన “దేశభక్తికి ” నిదర్శనం అవుతుందని రాహుల్ వ్యాఖ్యానించారు. ఈ కుట్రకు మోదీ, షా సూత్రధారులుగా ఉన్నారని, వారిపై కూడా విచారణ జరగాలని ఆయన పేర్కొన్నారు. అంతేకాదు ఆ ఇద్దరు నాయకులను ‘దేశద్రోహులు’ అని రాహుల్ గాంధీ అభివర్ణించారు. వారు భారతదేశ ప్రజాస్వామ్యంలో ‘ఓటు వ్యవస్థను ధ్వంసం చేశారని’ ఆరోపించారు.
ఇదిలా ఉండగా…ఎన్నికల నిర్వహణలో అవకతవకలు జరిగాయన్న ఆరోపణలను భారత ఎన్నికల సంఘం తోసిపుచ్చింది. తన పనితీరును సమర్థించుకుంది.
‘ప్రభుత్వ వ్యతిరేకత మాయం కావడం అసాధ్యం’
భారతదేశంలో ప్రభుత్వ వ్యతిరేకత మాయమైపోవడంపై ప్రశ్నలు లేవనెత్తడం ద్వారా రాహుల్ గాంధీ తన ఆరోపణలకు బలం చేకూర్చే ప్రయత్నం చేశారు. ఈ సందర్భంగా
విలేకరుల సమావేశంలో ఆయన మోదీ, షాలకు సంబంధించిన వీడియోలను ప్రదర్శించి, వారి మాటల ధోరణిని గమనించాలని విలేకరులను కోరారు. ఒక క్లిప్లో షా మాట్లాడుతూ బీజేపీ 30 ఏళ్లపాటు అధికారంలో ఉంటుందని చెప్పగా, మరొక క్లిప్లో 2024 లోక్సభ ఎన్నికలకు ముందు మోదీ ‘అబ్ కీ బార్ 400 పార్’ (ఈసారి 400 సీట్లు దాటాలి) అనే నినాదాన్ని లేవనెత్తడం కనిపించింది.
అటువంటి ప్రకటనలు ప్రజాస్వామ్య సాధారణ పనితీరుకు విరుద్ధమని రాహుల్గాంధీ వాదించారు. “భారతదేశంలో ‘ప్రభుత్వ వ్యతిరేకత’ అనే ఒక ప్రాథమిక శక్తి ఉంటుంది; అది వ్యతిరేకతను మొదలుపెడుతుంది, ఎవరినీ వదలదు,” అని ఆయన అన్నారు.
అత్యంత ప్రజాదరణ కలిగిన నాయకులు కూడా తక్కువ కాలంలోనే తీవ్ర వ్యతిరేకతను ఎదుర్కోవచ్చని చెప్పడానికి, 1971 బంగ్లాదేశ్ యుద్ధం తర్వాత మాజీ ప్రధాని ఇందిరా గాంధీ ఎదుర్కొన్న పరిస్థితులను ఆయన ఉదహరించారు. “ఇందిరా గాంధీ బంగ్లాదేశ్ యుద్ధంలో విజయం సాధించారు, కానీ రెండేళ్లలోనే ప్రభుత్వ వ్యతిరేకత కారణంగా ఆమెపై తీవ్ర ఒత్తిడి పెరిగింది. ఇది ఒకరి తర్వాత ఒకరు నాయకులకు జరుగుతూనే ఉంటుంది. కానీ మోదీ, షా, బీజేపీ విషయంలో మాత్రం అలా జరగడం లేదు — ఇప్పుడు దానికి కారణం ఏమిటో మనకు తెలిసిపోయిందని” రాహుల్గాంధీ అన్నారు.
“ఒక వ్యక్తి ప్రజాదరణను లేదా ప్రభుత్వ పనితీరును మనం అర్థం చేసుకోవచ్చు, కానీ ప్రభుత్వ వ్యతిరేకత పూర్తిగా మాయమైపోవడమా? సద్దాం హుస్సేన్ పాలనలోని ఇరాక్లో గానీ, ఉత్తర కొరియాలో గానీ ఇలాంటి పరిస్థితి ఉండదని ” రాహుల్ అన్నారు.
భారత ప్రజాస్వామ్య వ్యవస్థకు ఓటు అనేది పునాది అని, కాబట్టి దానిని రక్షించడంలో ఎన్నికల సంఘం పాత్ర అత్యంత కీలకమని రాహుల్ గాంధీ పేర్కొన్నారు. “ఓటు వ్యవస్థ ధ్వంసమైతే మన రాజ్యాంగం ధ్వంసమైనట్లే, దానికి ఇక ఎలాంటి శక్తి ఉండదు. రాజ్యాంగం ధ్వంసమైతే చట్టాలు పనిచేయవు. మన వ్యవస్థలు అర్థరహితం అవుతాయని ఆయన పేర్కొన్నారు.
భారతదేశంలో ఎన్నికలు అక్రమాలకు (రిగ్గింగ్కు) గురవుతున్నాయని తాను “వంద శాతం ఖచ్చితంగా” నమ్ముతున్నానని గాంధీ అన్నారు. “ఓటు చోరీ (దొంగతనం) నుండే చట్టం చోరీ, ఆ తర్వాత వ్యవస్థల చోరీ అనేవి సంభవిస్తాయని” రాహుల్ గాంధీ చెప్పారు.
