ఇంఫాల్: మణిపూర్‌లో మళ్లీ హిసాత్మక ఘటనలు చోటు చేసుకున్నాయి. కామ్‌జోంగ్ జిల్లాలో శనివారం రాత్రి అనుమానిత ఉగ్రవాదులు కుకీ కుటుంబాలకు చెందిన కనీసం 15 ఇళ్లకు నిప్పంటించారని, దీంతో అనేక మంది నివాసితులు సమీపంలోని అడవుల్లో, ఆర్మీ క్యాంపులో తలదాచుకున్నారని అధికారులు తెలిపారు.
అదే రోజు అంతకుముందు జరిగిన కాల్పుల ఘటనలో అనుమానిత ఉగ్రవాదులు ఒక కుకీ పౌరుడిని చంపి, మరో నలుగురిని గాయపరిచారని, ఆ తర్వాత చస్సాద్ గ్రామంపై ఈ దాడి జరిగిందని అధికారులు తెలిపారు.
హింసను అదుపులోకి తీసుకురావడానికి అస్సాం రైఫిల్స్, సరిహద్దు భద్రతా దళం, కామ్‌జోంగ్ పోలీసు సిబ్బందితో కూడిన సంయుక్త బృందాన్ని మోహరించినట్లు పోలీసులు తెలిపారు.ఈ దాడులను ఉప ముఖ్యమంత్రి నెమ్చా కిప్గెన్ ఖండించారు. పౌరుడి మృతి పట్ల విచారం, గాయపడిన గ్రామ నాయకులు, ఇళ్లు కోల్పోయిన కుటుంబాల పట్ల ఆందోళన వ్యక్తం చేశారు. ఇళ్లను తగలబెట్టడాన్ని ఆమె సహించరాని నేరంగా అభివర్ణించారు.
జిల్లా యంత్రాంగం, పోలీసులు, భద్రతా దళాలు నిరంతరం అప్రమత్తంగా ఉండాలని, పౌరుల ప్రాణాలను, ఆస్తులను కాపాడాలని, బాధ్యులను న్యాయస్థానం ముందు నిలబెట్టాలని తాను ఆదేశించినట్లు కిప్గెన్ తెలిపారు. శనివారం రాత్రి కామ్‌జోంగ్ జిల్లా కేంద్రంలో జరిగిన మరో ఘటనలో, వేరొక వర్గానికి చెందిన ప్రత్యర్థి సాయుధ బృందాలు జరిపిన దాడిలో ముగ్గురు టాంగ్‌ఖుల్ నాగా పౌరులు బుల్లెట్ గాయాలపాలయ్యారని అధికారులు తెలిపారు.
