హైదరాబాద్: అధికార తెలంగాణ రాష్ట్ర సమితికి చెందిన నలుగురు శాసనసభ్యులను కొనుగోలు చేసేందుకు భారతీయ జనతా పార్టీ చేసిన స్టింగ్ ఆపరేషన్ బుధవారం పోలీసులు ఛేదించారు. ఎమ్మెల్యేలే స్వయంగా పోలీసులను పిలిపించారు, వారు మొయినాబాద్ రోడ్డులో ఉన్న అజీజ్ నగర్‌ ఫామ్‌హౌస్‌లో భారీ మొత్తంలో నగదుతో ముగ్గురిని అరెస్టు చేశారు.
సైబరాబాద్ పోలీస్ కమిషనర్ ఎం స్టీఫెన్ రవీంద్ర తెలిపిన వివరాల ప్రకారం నలుగురు ఎమ్మెల్యేలు రేగా కాంతారావు, గువ్వల బాలరాజు, బీరం హర్షవర్ధన్ రెడ్డి, పైలట్ రోహిత్ రెడ్డి పోలీసులను అప్రమత్తం చేయడంతో ఫామ్‌హౌస్‌పై దాడులు నిర్వహించారు.
టీఆర్ఎస్ ఎమ్మెల్యేలను కొనుగోలు చేసేందుకు బేరసారాలు జరుగుతున్నాయనే అంశం రాష్ట్రంలో సంచలనం సృష్టించింది. సైబరాబాద్ పోలీసులు తమకు అందిన సమాచారంతో హైదరాబాద్ శివారులోని మొయినాబాద్ అజీజ్‌నగర్‌లోని తాండూరు ఎమ్మెల్యే పైలట్ రోహిత్ రెడ్డి ఫాంహౌస్‌లో బుధవారం రాత్రి సోదాలు జరిపారు. పార్టీ ఫిరాయిస్తే ఒక్కొక్కరికీ రూ.100 కోట్లతో పాటు కాంట్రాక్టుల ఆశ చూపుతూ.. ఢిల్లీలో అధికార బీజేపీకి చెందిన ఒక అగ్రనేతతో ఫోన్‌లో మాట్లాడించే యత్నం చేసిన మధ్యవర్తులను రాష్ట్ర పోలీసులు రెడ్‌హ్యాండెడ్‌గా పట్టుకున్నారు.
పట్టుబడిన ముగ్గురు వ్యక్తులు నగరంలోని డెక్కన్ ప్రైడ్ హోటల్ యజమాని నంద కుమార్, కేంద్ర మంత్రి జి కిషన్ రెడ్డికి సన్నిహితులు, ఢిల్లీ సమీపంలోని ఫరీదాబాద్‌కు చెందిన స్వామి రామచంద్ర భారతి అలియాస్ ఎస్ సతీష్ శర్మ, తిరుపతికి చెందిన సింహయాజులు.
“టిఆర్ఎస్ నుండి ఫిరాయించి బిజెపిలో చేరాలని కోరుతూ కొంతమంది తమను సంప్రదించారని ఎమ్మెల్యేలు పోలీసులకు చెప్పారు. ‘ఎమ్మెల్యేలు ఒక్కొక్కరికి 100 కోట్లు అందిస్తాం. ఏ రాష్ట్రంలో కావాలంటే ఆ రాష్ట్రంలో కాంట్రాక్టులు ఇస్తాం. మీకు ఏ పదవి కావాలో అది ఇప్పిస్తాం’ అని వారు ఆఫర్‌ చేశారని సైబారాబాద్ సీపీ స్టీఫెన్ రవీంద్ర చెప్పారు.
ఎమ్మెల్యేలు ఇచ్చిన సమాచారంతోనే.. పక్కాగా వల పన్ని, మొత్తం బేరసారాలనూ దాదాపు గంటన్నరపాటు ఆడియో, వీడియో రికార్డింగ్‌ చేసి మరీ ఆధారాలతో సహా వారిని అదుపులోకి తీసుకున్నట్టు పోలీసులు తెలిపారు.
ముగ్గురి బీజేపీ ఏజెంట్ల నుంచి స్వాధీనం చేసుకున్న మొత్తాన్ని పోలీసులు ఇంకా వెల్లడించనప్పటికీ, ప్రాథమిక నివేదికలు రూ. 15 కోట్లుగా సూచిస్తున్నాయి. ఈ మొత్తం ఆపరేషన్‌ను నంద కుమార్ సమన్వయం చేసి మిగతా ఇద్దరిని హైదరాబాద్‌కు తీసుకువచ్చినట్లు సమాచారం. ఓ కారు, పలు నగదు బ్యాగులను పోలీసులు స్వాధీనం చేసుకున్నారు.
ప్రత్యర్థి పార్టీల నుంచి రాజకీయ నాయకులను కొనుగోలు చేసేందుకు యత్నించి నగదుతో ముగ్గురిని పట్టుకోవడం ఇదే తొలిసారి కాగా, మునుగోడుకు నగదు తరలింపులపై నిఘాలో భాగంగా హైదరాబాద్‌లో వివిధ సందర్భాల్లో రూ.2.49 కోట్లను పోలీసులు స్వాధీనం చేసుకున్నారు. పట్టబడ్డ నగదు కూడా ఇద్దరు బీజేపీ నాయకులది కావడం విశేషం.