మహబూబ్ నగర్‌ : జిల్లా కేంద్రంలో 1000 పడకల సూపర్ స్పెషాలిటీ హాస్పిటల్ నిర్మాణానికి వైద్య, ఆరోగ్య శాఖ మంత్రి టి.హరీష్ రావు శంకుస్థాపన చేశారు. ఈ సందర్భంగా మంత్రి మాట్లాడుతూ.. మంత్రి శ్రీనివాస్ గౌడ్ పట్టుదలతో సూపర్ స్పెషాలిటీ ఆస్ప‌త్రిని జిల్లాకు తీసుకొచ్చారు. తెలంగాణ రాష్ట్రంలో ఏర్పాటైన తొలి మెడికల్ కాలేజీ కూడా మహబూబ్ నగర్‌ జిల్లాకే వ‌చ్చింద‌ని మంత్రి గుర్తు చేశారు. జిల్లాలో పారామెడిక‌ల్ కోర్సుల‌ను ఈ విద్యా సంవ‌త్స‌రం నుంచి ప్రారంభించుకుందామ‌ని ఆయన తెలిపారు.
మహబూబ్ నగర్‌పై ప్ర‌తిప‌క్షాల నాయ‌కులు మొస‌లి క‌న్నీరు కారుస్తున్నార‌ని హరీశ్రావు ధ్వ‌జ‌మెత్తారు. తెలంగాణ రాకపోతే మహబూబ్ నగర్‌కి మెడికల్ కాలేజ్ లు వచ్చేవా? అని ప్రశ్నించారు. మూడు వందల కోట్ల రూపాయలతో వెయ్యి పడకల మల్టీ సూపర్ స్పెషాలిటీ ఆసుపత్రికి శంకుస్థాపన చేసుకున్నామన్నారు.
మాజీ ముఖ్యమంత్రులు వైఎస్‌ రాజశేఖరరెడ్డి, చంద్రబాబునాయుడులు మహబూబ్‌నగర్‌లో సాగునీటి ప్రాజెక్టుల శంకుస్థాపనలకే పరిమితమయ్యారని, గతంలో సాగునీటి ప్రాజెక్టులను పూర్తి చేసి కరువును మార్చిన ఘనత ముఖ్యమంత్రి కేసీఆర్‌దే అని వైద్య, ఆరోగ్యశాఖ మంత్రి టీ హరీశ్రావు అన్నారు.
గతంలో మహబూబ్‌నగర్‌ను చంద్రబాబు దత్తత తీసుకున్నా ఒక్క సాగునీటి ప్రాజెక్టును కూడా పూర్తి చేయలేకపోయారు. శంకుస్థాపనలో భాగంగా రాజశేఖరరెడ్డి మొక్కలు నాటారు కానీ పనులు పూర్తి చేయలేదని మంత్రి హరీష్ రావు పేర్కొన్నారు.
తెలంగాణ ప్రభుత్వం భీమా, నెట్టంపాడు, కల్వకుర్తి ప్రాజెక్టులను పూర్తి చేసి జిల్లాలో ఆరు లక్షల ఎకరాలకు సాగునీరు అందించిందని, ఒకప్పుడు కరువుగా పేరొందిన మహబూబ్నగర్ ఇప్పుడు ‘సారవంతమైన’ జిల్లాగా మారిందని అన్నారు.
ఇతర ప్రాంతాలకు వలస వెళ్లిన ప్రజలు ఇప్పుడు వ్యవసాయం చేసేందుకు తిరిగి వస్తున్నారు. ఆసక్తికరంగా, ఆంధ్రప్రదేశ్, కర్ణాటక వంటి పొరుగు రాష్ట్రాల కార్మికులు కూడా ఇప్పుడు మహబూబ్నగర్ వ్యవసాయ క్షేత్రాలలో పనిచేస్తున్నారని ఆయన అన్నారు.
కృష్ణా నదీ జలాల పంపిణీ వివాదాలను పరిష్కరించాలని తెలంగాణ గత ఎనిమిదేళ్లుగా కేంద్రప్రభుత్వాన్ని కోరుతున్నా స్పందన లేదు. రాష్ట్ర భాజపా నేతలు హైకమాండ్‌తో ఎప్పుడూ ఈ అంశాన్ని ప్రస్తావించలేదని, ఇది తెలంగాణ పట్ల వారికి ఉన్న నిబద్ధతను తెలియజేస్తోందని అన్నారు.
తెలంగాణ ఏర్పడక ముందు మహబూబ్‌నగర్‌కు ఒక్క మెడికల్ కాలేజీ కూడా మంజూరు కాలేదు. ముఖ్యమంత్రి కేసీఆర్ జిల్లాకు మూడు వైద్య కళాశాలలను మంజూరు చేశారని హరీశ్రావు తెలిపారు.
గత ఎనిమిదేళ్లలో, తెలంగాణ ప్రభుత్వం 127 శాతం ఎంబిబిఎస్ సీట్లను పెంచింది. బిజెపి నేతృత్వంలోని కేంద్ర ప్రభుత్వం దేశవ్యాప్తంగా 71 శాతం మెడికల్ సీట్లను మాత్రమే పెంచింది.
అలాగే తెలంగాణలో పీజీ సీట్లలో 112 శాతం సీట్లకు గాను కేంద్ర ప్రభుత్వం కేవలం 68 శాతం సీట్లు మాత్రమే పెంచిందని, 1147 అసిస్టెంట్ ప్రొఫెసర్ల పోస్టుల భర్తీకి నోటిఫికేషన్ విడుదల చేసిందని, త్వరలోనే కసరత్తు పూర్తవుతుందని చెప్పారు.
వెయ్యి పడకల ఆస్పత్రి శంఖుస్థాపన కార్యక్రమంలో మంత్రి హరీష్ రావుతో పాటు, పర్యాటక శాఖా మంత్రి శ్రీనివాస్ గౌడ్, జ‌డ్పీ చైర్‌ప‌ర్స‌న్ స్వర్ణ సుధాకర్ రెడ్డి, ఎమ్మెల్యేలు లక్ష్మా రెడ్డి, ఆల వెంకటేశ్వర్ రెడ్డి, ఎమ్మెల్సీలు కసిరెడ్డి నారాయణ రెడ్డి, కలెక్టర్ వెంకట్రావు, అడిషనల్ కలెక్టర్ తేజస్ నందలాల్ పవార్, తదితరులు పాల్గొన్నారు.