వాషింగ్టన్ డీసీ: నరేంద్ర మోది నేతృత్వంలోని భారతదేశంలో… ‘మతపరమైన విశ్వాసాలు, స్వేచ్ఛ’ ప్రమాదంలో ఉన్నాయని యూఎస్‌ కమిషన్ తన వార్షిక నివేదకలో తెలిపింది. అంతర్జాతీయ మత స్వేచ్ఛపై భారతదేశాన్ని “ప్రత్యేక ఆందోళన కలిగిన దేశాల” జాబితాలో చేర్చాలని వరుసగా మూడవ సంవత్సరం కూడా యూఎస్‌ కమిషన్ కోరింది. ఈ సిఫార్సు కేంద్ర ప్రభుత్వానికి కోపం తెప్పించింది.
భారతదేశంలో, 2021లో ప్రధాన మంత్రి నరేంద్ర మోడీ ప్రభుత్వం మైనారిటీలకు విరుద్ధమైన విధానాల ద్వారా “హిందూ రాజ్యం యొక్క సైద్ధాంతిక దృష్టిని” ప్రచారం చేయడంతో మైనారిటీలపై, ముఖ్యంగా ముస్లింలు, క్రైస్తవులపై జరిగిన మతపరమైన దాడులను కమిషన్ ఎత్తి చూపింది. “భారతదేశంలో మత స్వేచ్ఛ పరిస్థితులు గణనీయంగా దిగజారిపోయాయి” అని నివేదిక పేర్కొంది.
“భారత ప్రభుత్వం ముస్లింలు, క్రిస్టియన్లు, సిక్కులు, దళితులు మరియు ఇతర మతపరమైన మైనారిటీలను ప్రతికూలంగా ప్రభావితం చేసే హిందూ-జాతీయవాద ఎజెండాను ప్రోత్సహించే విధానాలను ప్రోత్సహిస్తుందని” కూడా నివేదిక పేర్కొంది. దీంతో దేశంలో మూకదాడులు, బెదిరింపులు పెరిగాయి. అంతేకాదు జర్నలిస్టులు, మానవ హక్కుల న్యాయవాదుల అరెస్టులు జరుగుతున్నాయి. “హిందుయేతరులకు వ్యతిరేకంగా మత మార్పిడి నిరోధక చట్టాలను రూపొందించారు. మతమార్పిడి కార్యకలాపాలకు పాల్పడిన ముస్లింలు, క్రైస్తవులపై దాడులు పెరిగాయని యూఎస్‌ ప్యానెల్‌ నివేదించింది. ప్యానెల్‌లోని ఎవరూ భారతదేశానికి సంబంధించిన సిఫార్సుతో విభేదించలేదని కమిషనర్ అనురిమా భార్గవ విలేకరులతో అన్నారు.
గత కొన్ని సంవత్సరాలు భారత ప్రభుత్వం ఈ నివేదికను తిరస్కరిస్తూ వస్తోంది. అధ్యక్షుడు జో బిడెన్, అతనికి ముందు డొనాల్డ్ ట్రంప్ లాగా, చైనాను బూచిగా చూసి, భారతదేశంతో సంబంధాలను పెంచుకోవడానికి ప్రయత్నించారు. జపాన్, ఆస్ట్రేలియాతో “క్వాడ్” యొక్క నాలుగు-మార్గాల శిఖరాగ్ర సమావేశంలో భాగంగా బిడెన్ వచ్చే నెలలో టోక్యోలో మోడీని కలవనున్నారు.
2014లో మోడీ అధికారంలోకి వచ్చినప్పటి నుండి, ఆవులను అక్రమంగా రవాణా చేస్తున్నారని లేదా గొడ్డు మాంసం
తింటున్నారనే అనుమానంతో హిందూ మూకలు అనేక మంది వ్యక్తులను – ప్రధానంగా ముస్లింలు, దళిత హిందువులను కొట్టి చంపారు.
హిందూ తీవ్రవాద గ్రూపులు కూడా “లవ్ జిహాద్”పై ముస్లింలనులక్ష్యంగా చేసుకున్నాయి. కోవిడ్-19 వ్యాప్తికి ముస్లింలు కారణమనే ఆరోపణలు కూడా వచ్చాయి. ఇటీవలి సంవత్సరాలలో, ఉత్తర భారతదేశంలో శుక్రవారాల్లో ప్రార్థనలు చేస్తున్న ముస్లింలను హిందూ గుంపులు లక్ష్యంగా చేసుకున్నారు.
ఇటీవల కర్ణాటక రాష్ట్రంలో తరగతి గదుల్లో హిజాబ్ ధరించడాన్ని బీజేపీ నిషేధించింది. కరడుగట్టిన హిందూ సంఘాలు తర్వాత మరిన్ని భారతీయ రాష్ట్రాల్లో ఇటువంటి ఆంక్షలు విధించాలని డిమాండ్ చేశాయి. ముస్లిం మటన్ విక్రేతలు, పండ్ల విక్రేతలు కూడా తీవ్రవాద హిందూ సమూహాల లక్ష్యంగా మారారు.
ఈ నెల ప్రారంభంలో రామనవమి పండుగ సందర్భంగా, నమాజ్‌ చేస్తున్నప్పుడు మసీదుల వెలుపల హిందూ మూకలు పెద్ద శబ్ధంతో డీజే సంగీతాన్ని వినిపించారు., హిందూ గుంపులు అనేక ప్రాంతాల్లో మసీదులపై రాళ్లు రువ్వారు. ప్రముఖ హిందూ సన్యాసులు రోహింగ్యా తరహా భారతీయ ముస్లింలను జాతి ప్రక్షాళన చేయాలని ముస్లిం వ్యతిరేక వ్యాఖ్యలు చేశారు.