న్యూఢిల్లీ: భారతీయ కిసాన్ యూనియన్ (BKU), సంయుక్త కిసాన్ మోర్చా (SKM) ఈరోజు ట్రాక్టర్ మార్చ్ నిర్వహించనున్న నేపథ్యంలో నోయిడా పోలీసులు ఢిల్లీ-నోయిడా సరిహద్దు ప్రాంతంలో ట్రాఫిక్ అంతరాయాలు నివారించేందుకు, దారి మళ్లింపులపై ప్రయాణికులను హెచ్చరిస్తూ ట్రాఫిక్ అడ్వైజరీని జారీ చేశారు.
రబుపురాలోని మెహందీపూర్ నుండి ఫలైదా వరకు యమునా ఎక్స్‌ప్రెస్‌వే వెంబడి ట్రాక్టర్ మార్చ్‌ను నిర్వహించాలని BKU యోచిస్తోంది. దీంతో భద్రతా కారణాలరీత్యా పోలీసులు సెక్షన్ 144 కింద నిషేధాజ్ఞలను అమలు చేశారు. ఢిల్లీ, నోయిడాలోని కీలక ప్రవేశ, నిష్క్రమణ పాయింట్ల వద్ద అదనపు సిబ్బందిని మోహరించారు.
యమునా ఎక్స్‌ప్రెస్‌వే, లుహర్లీ టోల్ ప్లాజా, మహామాయ ఫ్లైఓవర్ మీదుగా ట్రాక్టర్ మార్చ్‌ను చేపట్టాలని రైతు సంఘాలు ప్లాన్ చేశాయి.
దీంతో ఆయా ప్రాంతాల్లో ట్రాఫిక్ అంతరాయాలను నివారించేందుకు నోయిడా పోలీసులు చర్యలను చేపట్టారు. చిల్లా బోర్డర్ నుండి ఢిల్లీకి వెళ్లే వాహనాలు గోల్చక్కర్ చౌక్ సెక్టార్-15 మీదుగా సెక్టార్ 14A ఫ్లైఓవర్‌ను ఉపయోగించుకోవచ్చు, అయితే DND సరిహద్దు నుండి వచ్చే వారు సెక్టార్ 18లోని ఫిల్మ్ సిటీ ఫ్లైఓవర్ మీదుగా ఎలివేటెడ్ రూట్‌లో ప్రయాణించవచ్చు. అదేవిధంగా, కాళింది సరిహద్దు నుండి వాహనాలు నావిగేట్ చేయవచ్చు. సెక్టార్ 37 ద్వారా మహామాయ ఫ్లైఓవర్ మీదుగా ప్రయాణించాలి.
యమునా ఎక్స్‌ప్రెస్‌వేని ఉపయోగించే ప్రయాణికుల కోసం, అసౌకర్యాన్ని తగ్గించడానికి ప్రత్యామ్నాయ మార్గాలను ఉపయోగించాలని, మెట్రోను ఎంచుకోవాలని సూచించారు. నిర్దిష్ట మార్గాల్లో గూడ్స్ వాహనాలు తమ గమ్యస్థానాలకు చేరుకోవడానికి ప్రత్యామ్నాయ మార్గాలను పరిగణించాలని సూచించారు.
ఇదిలా ఉండగా… దేశ రాజధాని వైపు తమ ప్రతిపాదిత పాదయాత్రను నిలిపివేయాలని రైతులు నిర్ణయించుకోవడంతో ఢిల్లీ పోలీసులు నిన్న సింగు, టిక్రీ సరిహద్దుల్లోని బారికేడ్లు తొలగించారు.
ప్రపంచ వాణిజ్య సంస్థ పరిథి నుండి వ్యవసాయాన్ని దూరంగా ఉంచేలా అభివృద్ధి చెందిన దేశాలపై కేంద్రం ఒత్తిడి తేవాలని డిమాండ్ చేస్తూ ఈ రోజు ‘క్విట్ డబ్ల్యుటిఓ డే’ని పాటించాలని సంయుక్త కిసాన్ మోర్చా (SKM) ప్రకటించింది.