న్యూఢిల్లీ: భారతీయ శిక్షాస్మృతితో సహా బ్రిటీష్ కాలం నాటి చట్టాల స్థానంలో నేటినుంచి మూడు కొత్త క్రిమినల్ కోడ్‌లు అమల్లోకి వచ్చాయి. ఇవి భారతదేశ క్రిమినల్ న్యాయ వ్యవస్థను గణనీయంగా మారుస్తాయి. వలసరాజ్య కాలం నాటి చట్టాలను ఇవి భర్తీ చేస్తాయి. భారతీయ న్యాయ సంహిత, భారతీయ నాగరిక్ సురక్షా సంహిత, భారతీయ సక్షా అధినియం.. పాత భారతీయ శిక్షాస్మృతి, క్రిమినల్ ప్రొసీజర్ కోడ్, ఇండియన్ ఎవిడెన్స్ యాక్ట్ స్థానంలో ఇవి రానున్నాయి.
కొత్త చట్టాలతో జీరో ఎఫ్ఐఆర్ ఫిర్యాదులను ఆన్లైన్లో నమోదు చేయడం, ఎస్ఎంఎస్ వంటి ఎలక్ట్రానిక్ పద్ధతిలో సమన్లు పంపడం, హేయమైన నేరాలకు సంబంధించిన క్రైమ్ స్క్రీన్లను తప్పనిసరి వీడియోల్లో బంధించడం వంటి ఆధునిక పద్ధతులు న్యాయ వ్యవస్థలో రానున్నాయి.
బ్రిటిష్ కాలం నాటి చట్టాల మాదిరిగా శిక్షకు కాకుండా, న్యాయం అందించేందుకు ఎక్కువ ప్రాధాన్యత ఇచ్చినట్లు కేంద్ర హూం మంత్రి అమిత్ షా తెలిపారు. చట్టాల పేరు మాత్రమే కాదు, వాటి సవరణలు పూర్తి భారతీయ ఆత్మతో రూపొందించామన్నారు. కొత్త చట్టాలు రాజకీయ, ఆర్ధిక, సామాజిక న్యాయాన్ని అందిస్తాయని చెప్పారు.
భారతీయ శిక్షాస్మృతిలోని రాజద్రోహాన్ని ఇప్పుడు దేశద్రోహంగా మార్చారు. కులం, మతం వంటి కారణాలతో సామూహిక దాడులు, హత్యకు పాల్పడితే ఐపీసీ ప్రకారం ఏడేళ్ల శిక్ష పడుతుంది. దీన్నిప్పుడు యావజ్జీవంగా మార్చారు. హేయమైన నేరాలకు సంబంధించిన క్రైమ్ సీన్ల వీడియో చిత్రీకరణ తప్పనిసరి చేశారు.
నకిలీ నోట్ల తయారీ, వాటి స్మగ్లింగ్ ఉగ్రవాదం పరిధిలోకి వస్తుంది. విదేశాల్లో మన ఆస్తుల ధ్వంసాన్నీ ఉగ్రవాదంగా నిర్వచించారు. డిమాండ్ల సాధనకు వ్యక్తులను బంధించడం, కిడ్నాప్ చేయడాన్ని ఉగ్రవాదం పరిధిలోకి చేర్చారు.
పెళ్లి చేసుకుంటానని మాయమాటలు చెప్పి మహిళలను వదిలేసిన కేసులకూ ఇప్పుడు చట్టంలో శిక్షలు ఉన్నాయి.
నేరాలకు గురైన మహిళా బాధితులు 90 రోజుల్లోగా తమ కేసులకు సంబంధించిన రెగ్యులర్ అప్డేట్స్ పొందే హక్కు ఉంది. నేరానికి గురైన మహిళలు, చిన్నారులకు అన్ని ఆసుపత్రులు ఉచితంగా ప్రథమ చికిత్స లేదా వైద్య చికిత్స అందించాలి.
అందరికీ సత్వర న్యాయం, న్యాయం జరిగేలా ఈ మార్పు చేశామని కేంద్ర హోంమంత్రి అమిత్ షా తెలిపారు. ఈ చట్టాలను సక్రమంగా అమలు చేయడానికి శిక్షణ, ఫోరెన్సిక్ బృందాలు అవసరం అవుతాయని, ఏడేళ్లు లేదా అంతకంటే ఎక్కువ శిక్ష పడే నేరాలకు వారి సందర్శనలు తప్పనిసరి అని ఆయన చెప్పారు.
జూలై 1 నుంచి కొత్త క్రిమినల్ చట్టాలను అమలు చేయాలనే నిర్ణయాన్ని కాంగ్రెస్‌తో సహా ప్రతిపక్ష పార్టీలు హడావిడిగా తీసుకున్నారని విమర్శించాయి. వాటిని అమలు చేయడానికి ముందు మరింత సంప్రదింపులు అవసరమని పార్టీ పేర్కొంది.
కొత్త క్రిమినల్ చట్టాల అమలును వాయిదా వేయాలని పశ్చిమ బెంగాల్ ముఖ్యమంత్రి మమతా బెనర్జీ ప్రధాని నరేంద్ర మోదీని కోరారు. పార్లమెంటు, వాటిని మళ్లీ సమీక్షించవచ్చని ఆమె అన్నారు.