న్యూఢిల్లీ: ఢిల్లీలోని ఓల్డ్ రాజేంద్ర నగర్‌లో సివిల్ సర్వీసెస్ పరీక్షలకు సిద్ధమవుతున్న ముగ్గురి అకాల మరణంతో మునిసిపల్ కార్పొరేషన్ ఆఫ్ ఢిల్లీ అప్రమత్తమైంది. భద్రతా నిబంధనలను ఉల్లంఘిస్తూ బేస్‌మెట్‌లో అక్రమంగా లైబ్రరీని ఏర్పాటు చేయడం వల్లనే ఈ ప్రమాదం సంభవించినట్లు అధికారులు గుర్తించారు. దీంతో దేశ రాజధాని నగరంలో చట్టవిరుద్ధంగా బేస్‌మెంట్లలో నడుపుతున్న కోచింగ్ ఇన్‌స్టిట్యూట్‌లను తనిఖీ చేసి, 13 కోచింగ్ సెంటర్‌లను సీల్ చేసింది.
ఈ ప్రాంతంలో మురుగునీటి కాల్వలను ఆక్రమించి నిర్మాణాలను చేపట్టినందునే వరదలకు కారణం అని తేల్చారు. దీంతో అక్రమ నిర్మాణాలను కూల్చివేయడానికి ఓల్డ్ రాజింద్ర నగర్‌లో ఆక్రమణ నిరోధక డ్రైవ్‌ను కూడా నిర్వహించిందని అధికారులు తెలిపారు.
నగరంలోని ఇతర ప్రాంతాల్లో వాణిజ్య కార్యకలాపాలకు బేస్మెంట్లను అక్రమంగా ఉపయోగిస్తున్న సంస్థలపై కూడా సీలింగ్ డ్రైవ్ నిర్వహిస్తామని ఎంసీడీ కమిషనర్ అశ్వనీ కుమార్ విలేకరులకు తెలిపారు.
ఇప్పటివరకు, రాజేంద్ర నగర్, ముఖర్జీ నగర్ ప్రాంతాల్లో బేస్మెంట్లను చట్టవిరుద్ధంగా లైబ్రరీలుగా లేదా తరగతులు ఉపయోగిస్తున్న 20 కోచింగ్ సెంటర్‌లబేస్‌మెంట్లకు సీలు చేసినట్లు అధికారులు తెలిపారు.
“ఆదివారం వరకు మేము రాజేంద్ర నగర్‌లో నడుస్తున్న 13 బేస్‌మెంట్ల కోచింగ్ ఇన్‌స్టిట్యూట్‌లపై చర్యలు తీసుకున్నాము. సోమవారం మేము సీలింగ్ డ్రైవ్‌ను తిరిగి ప్రారంభించాము. అదే ప్రాంతంలోని అలాంటి ఇన్‌స్టిట్యూట్‌లకు చెందిన మరో ఆరు బేస్మెంట్లను సీల్ చేసాము. “వరద కాలువలను కప్పి ఉంచే నిర్మాణాలను తొలగించడానికి MCD యాంటీ-ఆక్రమణ డ్రైవ్‌ను కూడా నిర్వహించిందని ఢిల్లీ మేయర్ షెల్లీ ఒబెరాయ్ చెప్పారు.
దృష్టి IAS ఇన్స్టిట్యూట్, వాజి రామ్,రవి IAS హబ్, రాజిందర్ నగర్‌లోని శ్రీరామ్ IAS ఇన్స్టిట్యూట్‌లు ఈ జాబితాలో ఉన్నాయని మునిసిపల్ కార్పొరేషన్ ఆఫ్ ఢిల్లీ ఒక అధికారిక ప్రకటనలో తెలిపింది. వాజీరామ్‌, రవి ఐఏఎస్ హబ్‌ల భవనంలోని మూడు బేస్మెంట్లను సీల్ చేసినట్లు తెలిపారు.
భారీ వర్షం కారణంగా రాజిందర్ నగర్‌లోని రావు ఐఏఎస్ స్టడీ సర్కిల్, వారి కోచింగ్ సెంటర్ బేస్‌మెంట్‌లో ఉన్న లైబ్రరీ ముంపునకు గురై, ముగ్గురు సివిల్ సర్వీసెస్ అభ్యర్థులు మరణించిన రెండు రోజుల తర్వాత తనిఖీలు ముమ్మరమయ్యాయి.