హైదరాబాద్: మే 7న ఉస్మానియా యూనివర్సిటీ క్యాంపస్‌కు కాంగ్రెస్ అధినేత రాహుల్ గాంధీ పర్యటనకు అధికారులు అనుమతి నిరాకరించడాన్ని నిరసిస్తూ విద్యార్థి సంఘాలు చేపట్టిన నిరసనలు సోమవారం కూడా కొనసాగాయి. ఉస్మానియా యూనివర్శిటీ జాయింట్ యాక్షన్ కమిటీ (ఓయూ జేఏసీ) క్యాంపస్‌లోని ఆర్ట్స్‌ కాలేజీ ఎదుట ఆందోళనకు దిగిన నేతలను పోలీసులు అరెస్టు చేశారు.
తెలంగాణ రాష్ట్ర సమితి (టీఆర్‌ఎస్) ప్రభుత్వ ఆదేశాల మేరకు రాహుల్ పర్యటనకు యూనివర్సిటీ అధికారులు అనుమతి నిరాకరించారని ఆరోపిస్తూ, విద్యార్థులతో మమేకమయ్యేందుకు కాంగ్రెస్ నాయకుడిని క్యాంపస్‌కు వెళ్లేందుకు అనుమతించాలని డిమాండ్ చేశారు. పోలీసులు జేఏసీ నేతలను అరెస్ట్ చేసి పోలీస్ స్టేషన్‌కు తరలించారు. విద్యార్థి సంఘాల నిరసనల నేపథ్యంలో పోలీసులు క్యాంపస్‌లో భద్రతను కట్టుదిట్టం చేశారు.
ఆదివారం ఎన్‌ఎస్‌యుఐ రాష్ట్ర అధ్యక్షుడు వెంకట్ బల్మూర్ నేతృత్వంలోని నిరసనకారులు ఓయూ అడ్మినిస్ట్రేటివ్ భవనంలోకి చొరబడి తాళం వేసి ఉన్న వైస్ ఛాన్సలర్ కార్యాలయంలోకి ప్రవేశించేందుకు ప్రయత్నించడంతో క్యాంపస్‌లో పెద్ద సంఖ్యలో పోలీసులను మోహరించారు. ముఖ్యమంత్రి కె. చంద్రశేఖర్‌రావు ఆదేశాల మేరకు వైస్ ఛాన్సలర్ వ్యవహరిస్తున్నారని ఆరోపిస్తూ వైస్ ఛాన్సలర్, ప్రభుత్వానికి వ్యతిరేకంగా నినాదాలు చేస్తూ తలుపుల అద్దాలను పగులగొట్టారు. మహిళా పోలీసు కానిస్టేబుల్ ఫిర్యాదుమేరకు ఎన్‌ఎస్‌యూఐ నాయకులపై అభియోగాలు మోపారు.
వెంకట్ బల్మూర్‌తో పాటు మరో 17 మందిని మేజిస్ట్రేట్ ముందు హాజరుపరచగా, వారిని 14 రోజుల జ్యుడీషియల్ కస్టడీకి పంపారు. ఎన్‌ఎస్‌యూఐ నేతల అరెస్ట్‌ను కాంగ్రెస్ ఎంపీ, తెలంగాణ పార్టీ వ్యవహారాల ఇంచార్జి మాణికం ఠాగూర్ ఖండించారు. వారిని వెంటనే విడుదల చేయాలని డిమాండ్ చేశారు. బంజారాహిల్స్‌లోని మినిస్టర్స్‌ క్వార్టర్స్‌ వద్ద ఆదివారం విద్యార్థి సంఘాల నేతలు నిరసనకు దిగడంతో వారిని అరెస్టు చేశారు.
అరెస్టు చేసిన విద్యార్థులను కలిసేందుకు కాంగ్రెస్ ఎమ్మెల్యే జగ్గారెడ్డి పోలీస్ స్టేషన్‌కు వెళ్లారు. అక్కడినుండి ఓయూ క్యాంపస్‌కు వెళ్లేందుకు ప్రయత్రించడంతో పోలీస్ స్టేషన్‌లో నిర్బంధించారు. రాహుల్ గాంధీ క్యాంపస్ పర్యటనకు అనుమతి ఇవ్వాలని కోరుతూ జగ్గారెడ్డి గత వారం యూనివర్సిటీ అధికారులను ఆశ్రయించారు. అయితే క్యాంపస్‌లో ఎలాంటి బహిరంగ సభను అనుమతించకూడదని గతంలో తీసుకున్న నిర్ణయాన్ని పేర్కొంటూ విశ్వవిద్యాలయం అనుమతి నిరాకరించింది.
అయితే రాహుల్ గాంధీ పర్యటన రాజకీయం కాదని కాంగ్రెస్ నేతలు పేర్కొన్నారు. హాస్టల్‌, మెస్‌లను సందర్శించి విద్యార్థులతో మాట్లాడి వారి సమస్యలను తెలుసుకుంటానని చెప్పారు. అతను దేశంలోని వివిధ ప్రాంతాల్లోని విశ్వవిద్యాలయాలను సందర్శిస్తున్నాడని వారు గుర్తుచేశారు.
రాహుల్ గాంధీ ఉస్మానియా వర్సిటీకి వెళ్లి తీరతారని టీపీసీసీ మాజీ చీఫ్ ఉత్తమ్ కుమార్ రెడ్డి స్పష్టం చేశారు. ఓ సాధారణ ఎంపీలా, ఓ సామాన్య పౌరుడిలా రాహుల్ ఓయూకి వెళతారని తెలిపారు. ఓయూని కేసీఆర్ తన సొంత జాగీరులా భావిస్తున్నారని మండిపడ్డారు. “బీజేపీ నేతలు ఉస్మానియా యూనివర్సిటీని సందర్శించి, సమావేశాల్లో ప్రసంగించగలిగినప్పుడు, కేసీఆర్, కేటీఆర్‌ల పుట్టినరోజులు జరుపుకోగలిగినప్పుడు, మా నాయకుడు ఎందుకు క్యాంపస్‌ను సందర్శించకూడదు. ఉస్మానియా వర్సిటీ ఏమైనా సీఎం కేసీఆర్ సొత్తా అని ఆయన ప్రశ్నించారు.
తెలంగాణ ఉద్యమంలో మొదటి, రెండో విడత ఉద్యమంలో ఉస్మానియా యూనివర్సిటీ కీలకపాత్ర పోషించినందున రాహుల్ గాంధీ క్యాంపస్‌కు వెళ్లి విద్యార్థులతో మమేకమై వివరాలు సేకరించాలని భావిస్తున్నట్లు రాష్ట్ర కాంగ్రెస్ చీఫ్ రేవంత్ రెడ్డి తెలిపారు. అసలు రాహుల్ గాంధీ ఉస్మానియా వర్సిటీలో పర్యటనకు కేసీఆర్ ఎందుకు భయపడుతున్నారు? అని రేవంత్ రెడ్డి ప్రశ్నించారు.
రాహుల్ గాంధీని ఉస్మానియా వర్సిటీకి తీసుకెళ్తాం: రేవంత్ రెడ్డి
అక్రమ అరెస్టులు, నిర్బంధాలతో ఉద్యమాలను రాష్ట్రప్రభుత్వం నియంత్రించలేదని పీసీసీ అధ్యక్షుడు రేవంత్ రెడ్డి స్పష్టం చేశారు. రాహుల్ పర్యటన కోసం ప్రజాస్వామ్యయుతంగా అనుమతి కోసం ప్రయత్నించిన ఎన్‌ఎస్‌యూఐ నేతలను అరెస్టు చేయడంపై రేవంత్ మండిపడ్డారు. ప్రభుత్వం ఎన్ని అడ్డంకులు సృష్టించినా రాహుల్ గాంధీ ఉస్మానియా విశ్వవిద్యాలయంతో పాటు చంచల్‌గూడ కారాగారాన్ని సందర్శిస్తారని తేల్చిచెప్పారు. ఓయూకి కేంద్రం నుంచి నిధులు రాబట్టేందుకు రాహుల్ గాంధీ పార్లమెంట్లో నిలదీస్తారని ఆయన ఈ సందర్భంగా వెల్లడించారు. ఓయూలో యూజీసీ నిధులు సరిగా వినియోగం అవుతున్నాయా.. ఓయూలో నియామకాలు సరిగా జరుగుతున్నాయా లేదా అని రాహుల్ తెలుసుకుంటారన్నారు.
ఓయూలో రాహుల్ పర్యటనకు అనుమతి నిరాకరణ… కాంగ్రెస్ శ్రేణుల నిరసన!
