హైదరాబాద్: భారతీయ జనతాపార్టీ మళ్లీ అధికారంలోకి వస్తే రాజ్యాంగాన్ని సవరించి ఎస్సీ, ఎస్టీ వర్గాలకు రిజర్వేషన్లను రద్దు చేయాలనే యోచనలో ఉందని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. ఆదిలాబాద్ పార్లమెంట్ నియోజకవర్గంలో జరిగిన ఎన్నికల ప్రచార సభలో ఆయన మాట్లాడుతూ…బీజేపీ తీసుకుని వచ్చే ఈ మార్పులు అణగారిన వర్గాలకు పెద్ద ముప్పుగా మారుతాయని ఆందోళన వ్యక్తం చేశారు.
లోక్‌సభ ఎన్నికల్లో మూడింట రెండొంతుల మెజారిటీ సాధించడం వల్ల ఎస్సీ, ఎస్టీ రిజర్వేషన్లను తొలగించే లక్ష్యంతో ఉందని ఉత్తరప్రదేశ్, కర్ణాటకకు చెందిన ప్రముఖ బీజేపీ నేతలు బహిరంగంగా ప్రకటించారని కేటీఆర్ అన్నారు. అదే జరిగితే ఎస్సీ, ఎస్టీ వర్గాలకు తీరని అన్యాయం జరుగుతుందని అన్నారు.
దళిత, గిరిజన సంఘాలు బీజేపీ వ్యూహాన్ని గుర్తించి ఓటు వేయాలని కేటీఆర్ విజ్ఞప్తి చేశారు. కుటుంబ నియంత్రణ విధానాలను అనుసరిస్తున్న దక్షిణ భారత రాష్ట్రాలు, ఈ చర్యలను పాటించని ఉత్తరాది రాష్ట్రాలతో లోక్‌సభ స్థానాలను కోల్పోయే అవకాశం ఉందని హెచ్చరిస్తూ నియోజకవర్గాల డీలిమిటేషన్ అంశంపై కూడా ఆయన మాట్లాడారు.
కాంగ్రెస్ తప్పుడు వాగ్దానాలు చేస్తోందని కేటీఆర్ విమర్శించారు. ఆగస్టు 15లోగా వ్యవసాయ రుణాలు మాఫీ చేస్తానని ఆ పార్టీ నాయకుడు రేవంత్ హామీ ఇచ్చారని కేటీఆర్ అన్నారు. వాగ్దానాలు నెరవేరాలంటే ప్రజలు బీఆర్‌ఎస్‌కు మద్దతు ఇవ్వాలని ఆయన కోరారు.